Chhimlam power pek dan dinhmun bawrhsap-in en

Power & Electricity department hnuaia Lunglei Power Circle (LPC) superintending engineer (SE) office, Lunglei Power Maintenance Division-I (PMD-I) executive engineer (EE) office leh Lunglei Power Sub-Station chu Ningani khan Lunglei bawrhsap R Lalthazuala’n a tlawh.
P&E Lunglei Power Circle SE Lalrinmawia hoin department thawktuten bawrhsap hi an lo dawngsawng a. Office hmunhma leh 2×6.3 MVA, 33/11 kV Sub-Station Lunglei fanpuiin, khawl leh thawktu dinhmun, an hna thawh dan an hrilhfiah. Lunglei Power Division hnuaia khaw hrang hrangin hnianghnar zawka kawlphetha an hmuh theihna tura thil pawimawh hmalakna tur ruahmanna an sawi ho a ni.
Mipui himna atan khawchhunga kawlphetha hrui thlun hnaih lutuka in sak pumpelh a nih theih nan hma lak dan tur sawi a ni a. Lunglei khawpui chhungah kawnghmang nei leh felfai zawka power, TV, telephone, internet adt. hrui chi zam/ thlun a nih theih nan rawtna sawi ho niin, a tul anga bawhzui nise, an ti.
Lunglei Power Circle hian Mizoram chhimlam district pali – Lunglei, Siaha, Lawngtlai leh Hnahthial a bial a; a huamchhungah hian consumer 66949 an awm a ni.
Lunglei Power Circle hnuaiah hian 132kV sub-station pahnih – Khawiva leh Kawmzawlah a awm a; 33kV sub-station 17 leh distribution transformer (DT) 680 a awm bawk.