Chhimtuipui Group YMA-in Siaha hmasawnna tur lam rel

YMA Chhimtuipui Group chuan Thawhlehni khan Siaha-ah rorel inkhawm vawi 3-na an hmang a. Chhimlam, a bikin Siaha district hmasawnna tur hrang hranga hma lak an rel.
Rorel inkhawm hi YMA Council Vaih Branch chuan thlengin, YMA Chhimtuipui Group president Prof. Chawngkhuma Chawngthu chuan a kaihruai a. Secretary R Lalnghakliana chuan palai lawmna sawiin report a pe a. An member zinga chatuan ram pan ta te sunna hmangin, District Legal Services Authority Siaha atangin dan leh hrai lama YMA member-te hriat tur an sawi a ni.
Kum 2024- 2025 chhunga YMA Chhimtuipui Group budget atan Rs. 2,90,000 pawm a ni a, rorelnaah hian sawrkar khawih agenda 14 leh YMA khawih agenda 12 ngaihtuah a ni.
YMA Chhimtuipui Group hnuaiah hian branch 13 awmin, tun dinhmunah member 1469 an awm mek.

Rorel inkhawma thurel:
# Chhimlam tlangdungin power supply tha zawk an hmuh theih nana sawrkara thlen a, alternative line siam mek pawh chak taka thawh a nih theih nan hma lak
# Siaha khawpui bawlhhlawh paihna sawnchhuah tura hma lak mek chu chak zawka kalpui a nih theih nana hma lak
# All India Radio Sub Station Siaha chu tun aia changtlung zawka thuam a nih theih nan thuneitute hnena thlen.
# Supply kudam Siahaah electronic weighing scale hman a nih theih nana hma lak
# Siaha district-a sawrkar department office/ head of office hmun awl dah khah a nih theih nana hma lak
# Tipi Ferry-ah fur lai pawha lirthei tlan theiha lei dawh a nih theih nan thuneitute dawr
# Tuihna humhalh leh faina kawngah chak zawka hma lak
# Ruihhlo do kawngah sawrkar leh NGO te tha tichak a, theih ang tawka thawhpui
# Zonun zemawi – Mizo tlawmngaihna vawnnun kawngah chak zawka hma lak
# YMA Chhimtuipui Group leh a hnuaia branch ho chanchin ziaka dah tura hma lak