Chhinga Veng leh Police an tlang ve leh

aini khan Muallungthu Field-ah Ground B group match hnuhnung ber khelh a ni a, Mizoram Police FC leh Chhinga Veng FC chuan an khingpui ve ve hnehin semifinal an lut. Semi-final hi inrinniah khelh a ni ang.
Chhinga Veng FC 2-2 Chawnpui FC
Group B-ah point ruk hmua hmahruai mektu Chhinga Veng FC chuan nilaini chawhnu dar khat khan point thum hmu tawh a Chawnpui FC an hmachhawn a. Inkhel hmuhnawm takah 2-2 a an inhnehtawk vangin CVFC hian group champion ni tura an mamawh point an hlawhchhuak a, semi-final an lut.
Group B-a hmahruaitu CVFC hian chak ngei tumin an khingpuite an hmachhawn a. Semi-final lut thei tura chak ngei mamawh Chawnpui lakah tum hnih hma hruai mah se an hmahruaina an venghim zo lo ve ve a, point thum an hmu zo bik lo. Chak tumruh tak Chawnpui FC lakah hian minute 40-naah Lalnunzira chuan CVFC hmahruaina goal a thun a, si khat faia hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal a lut har leh viau bawk. Minute 78-naah David Lalchhuanawma chuan penalty pet goal in Chawnpui FC si phurh a sut. An si phurh an sut vangin phur thar viau mah se an phur rei lo viau a, goal an chhuah zui leh thuai. Chawnpui FC in goal an thun atanga minute hnih hnu lekah CVFC tan Johny Lalremruata chuan hma an hruai nawn lehna goal a thun. Johny-a goal hi an chakpui teuh viau a. Minute 90+1-ah Chawnpui FC tan Lalhmangaihsanga chuan goal thunin an si phurh a sut nawn leh a, 2-2 in an inhnehtawk zui ta a ni.
Chawnpui FC lakah hnehna an chan leh tak vangin Chhinga Veng FC hian point kua hmuin, group champion an ni a, semi-final an lut. Semi-final-ah Group A-a pahnihna Chanmari FC chu Inrinni chawhnu dar 2:00 khian RG Stadium-ah an hmachhawn zui leh ang.
CVFC in semi-final an luh laiin Chawnpui FC erawh an tlang zo lo thung. Inkhel lehlamah Mizoram Police FC in Project Veng FC an hneh vangin Chawnpui hi point li hmu chungin an tla.
Mizoram Police FC 3-0 Project Veng FC
Nilainia inkhel hmasa zawkah point thum hmu tawh Mizoram Police FC chuan point la hmu lo Project Veng FC chu si thum faiin an hneh a, Aizawl FC hmachhawn turin semi-final an lut.
MPFC hian semi-final lut turin beisei nei tawh lo Project Veng FC lakah chak an mamawh a, chak ngei tumin an khingpuite an nawr na viau a, hnehna lian an sualchhuak zui ta nghe nghe. MPFC tan hian minute 23-naah inelna neih meka chetha tak Lalbiakhlua chuan penalty atangin hmahruaina goal a thun. Biaktea goal hmang hian hun rei tak chhung hma an hruai a, chawlhlawk hnu lamah goal hnih an thun belh zui leh.
Chawlhlawk hnu lamah MPFC an khel tha zui viau a, inkhel a thunun fel viau tawh. Minute 65-naah Malsawmfela chuam an goal hnihna a thun a. Minute 77-naah Lalnunsanga chuan an goal thumna a thun belh zui leh bawk a. Si thum faia hnehna changin semi-final an inhlangkai zui ta a ni.
Group B-ah point ruk hmua pahnihna Mizoram Police FC hian semi-final-ah champion tura rinkai Aizawl FC an hmachhawn zui leh dawn a. I League club AFC nen hian inrinni chawhma dar 11:00-ah an inkhel tan ang.
Group B atanga Chhinga Veng FC leh Mizoram Police FC te an tlang laiin Chawnpui FC leh Project Veng FC te an tla a. Project Veng FC hian khelh an tlawm zawn a, point hmu lovin inelna an thlah liam.