Chhuanthar furniture workshop-in a bulhnaia chengte hriselna nghawng

Chhuanthar furniture workshop-in a
bulhnaia chengte hriselna nghawng
Baktawng leh Chhuanthar khuaa furniture workshop-ten a chhehvela cheng mipui hriselna atana harsatna an siam tih report thehluh chungchangah Serchhip district bawrhsap Paul L Khuma hoin inrawnkhawm a ni a. Serchhip SP Gavit Gogna leh a kaihhnawih sawrkar hotute leh khawtlang hruaitute an tel.
Senior chief medical officer Serchhip Dr LP Malsawma chuan, air pollution avanga mihring hriselna chhiat theih dan a sawi a. Health worker-te pawhin Chhuanthar naupangten hritlang awmna an vei rei bik tih an report tih a sawi. Furniture workshop atanga boruak tha lo in a thlen a ni thei em tih chu finfiahna awm rih lo mah se, thil awm thei a ni tih a sawi a ni.
Thutkhawmah hian Baktawng leh Chhuanthara furniture workshop neitute koh tel niin, an eizawnnain mipui hriselna a nghawng thei tih an inpawm a, theih ang angin inkaihhruaina pawh an siam thin tih an sawi.
He harsatna chinfel dan tur sawiho a nih hnuah, industrial vacuum cleaner chu society anga hman nise, Chhuanthar MPACS lamin pathum an dawn tawh chu hmang tan nghal se, an ti. Baktawng chu industrial area-a puan a nih thuai theihnan thuneitute hma la tura ngen an ni a, industrial area-a puan chin huamchhungah mihring chen khap tlat nise, an ti.
He thil hi chinfel a nih theihnan leh mipui hriselna atana him tur inzirtirna kawngah chak taka hma la turin Baktawng leh Chhuanghar VC leh Society hruaitute ngen an ni a. District administration chuan tih tur leh tih loh tur kimchang taka ziakin prohibitory order a tichhuak dawn a ni.