Chhui chian a tha ang….

Mizorama rel kawng siam mek chungchanga tunhnaia chief minister rawn hmutu Chetan Kumar Shrivastava, General Manager, NF Railways leh a thawhpuite chuan, Mizorama rel kawng siamna thir chu misualin an ruk nasat thu sawiin, gas hmangin thir an tan a, thir kilhzawmna bolt te leh bearing te a bo nasa niin chief minister hnenah an thlen a. Thir rutute hian motor-in an phur chhuak thin, an ti bawk. Chu mai chu a la ni lova, FIR te pawh police-ah an thehlut niin an sawi bawk.
Nikum August ni 23-a rel kawnga lei dawh lai chim chungchangah khan, railway hotute khan an thir bungrua a bo nasat thu leh iron rod siamna hmunpui Ispat-ah thir rututen an hralh thin nia sawi chu enfiah an duh thu an lo sawi tawh a.
Kha thil thlen atang khan kum khat thuak a liam leh ta a, rel kawng siamna thir a bo nasat thu an rawn auchhuahpui leh ta a ni a. Hei hi enfiah a, chhui chian a, thil awmzia dik tak hmuhchhuah tum hi tihmakmawh a ni tawh.
Relkawng thir bo dan railway hotuten an sawi hmangah chuan, thir hi gas hmanga tan (cut) niin, motor-ah hlangin an phur thin tih an sawi thei a. Hei hi rukhmangte hnuhma atangin a lang an tihna a ni thei awm e.
Rel kawng thirte hi gas hmanga cut ngai khawp chu a tumtlang hlawm hle dawn a, motor-a hlang tur pawhin hmanrua tha tawk nen thawhchhuah a ngai dawn tihna a ni. Rel kawng bulah motor nen, thir tanna tur gas nen rik deuh rup a ngai ngei ang a, thawm pawh a zawi thei dawn lo tih a chiang reng mai. Chutianga rukrute che vel hmu loa railway lam an awm thei hi thil mak tak a ni. Rel kawng siam hna thawktute zingah hian lungmuang taka a ruka thil ti duh lo awm ta se, tunhmaa lei (bailey bridge) thir bo thin dan chanchin lo hre ve kar tan chuan puhmawh tur a tha dawn hle tihna pawh a ni thei awm e. Chuvangin, anmahni mi leh sate zingah, remchanna lo zawng ru ran an awm thei ve bawk tih thlengin a ngaihtuah theih awm e.
Rel kawng Lei dawh lai chim kha, metre 150 vela sang a ni a, thir cut-na gas nena lawnchilh chu huphurhawm tak a ni. Kha thil thleng pawh kha, khuareiah chuan ‘thir rutute vang’ tih a la hlawh thei mai ang tih hlauhawm tak a ni.
A thu hrimin, rel kawng siam mek vengtu tur patroling squad hi an awm tura ngaih a ni a, hetiang rel kawng thir tumtlang, rit tak tak, thawm bengchheng tak leh mit la tak nena ruk theiha a awm hrim hrim pawh hi thil dik lo tak chu a ni. Iron rod siamna hmunpui Ispat-ah hralh a ni thin anga an sawi pawh hi, finfiah a harsa hauh lovang le. FIR thehlut angin an insawi a, kan police uisathiamte hian an chhui chhuak thei ta lo tihna em ni? Zawhna a tam awm e. Eng pawh ni se, hmasawnna hna thawhna tur hmanrua/bungrua ru bo zel thin anga thang mawi lo thei kan nih avangin, he thil hi chhui chian a, thudik tak hai lan a, tunhnua a thlen tawh loh nana hmalak hi tihmakmawh a ni.
Chutih rualin, a dik a dawk pawh thlu lova, finfiahna leh thil chiang zawk hriat hmaa thiamloh lo inchantir a, hnamdangte hriat tura mahni insawichhiat zui vak vak kan ching thin hi thil atthlak leh tha lo tak a ni a, hetiang thilah hian, misual tan vang ni lovin, a hnam anga thil kan thlir thiam ve zel hi a pawimawh a ni.