Chhungkaw 300 chuangin Tuilian leh lei che tuar tawh

Ni li chhung vel chawl loa ruahsur chuan Mizoram hmun thenkhat, a bikin Lunglei leh Lawngtlai district huamchhung a nghawng nasa a, lei che leh tuilian vangin chhungkaw 300 chuangin an chenna in chhuahsanin hmun him lam an pan tawh a, leiminin kawng a hnawh vangin inkalpawhna lamah nunphung pangngai a khaihlak phah bawk.Hriat theih chinah Lunglei district Tlabung leh a chhehvel chu a tuar na ber an ni a. Khawthlangtuipui lian zelah Tlabung leh a bulhnai khaw 9 vela chhungkaw 290 chuang chuan an chenna in an chhuahsan tawh a, leimin vangin chhungkaw 2-in chenna in an chhuahsan tawh bawk.
Tlabung khawchhung bikah tuilian vanga hmunhim lama insawn chhuak hi an vaiin chhungkaw 108 an tling tawh a. Tlabung SDO (C) H Zonunmawia ruahmanna in zirna in, sawrkar building ruak remchang leh vantlang hall-a an inthiar luh bakah mahni chhungte pana fin lailawk chhungkaw engemawzat an awm bawk.
Tuilian hian chenna in bakah infiamna hmunhma tiamin vantlang hmun pawimawh a chim nual tawh a, Tlabung khawchhunga tuilian tuarte chu YMA Tlabung branch-in bungrua senghawi puiin Thawhtanni zan pawh khan tlaivarin an buaipui tih thu dawn a ni.
Tuichawng lui lian vangin Chawngte leh a chhehvel khaw engemawzat chu an buai mek bawk a. Chakma Autonomous District Council hotute sawi danin, an huamchhunga khaw 85 awmah Bangladesh lam hnaih khaw 60 vel chu tuilian hian a tibuai tawh tih an sawi.
Hriat theih chinah Chawngte bikah hian chhungkaw 45 chu hmun him lamah an insawnchhuak tawh a, tuilian hian zual lam pan chak viau lo mah se, hlauhawm dinhmunah an la ding tih sawi a ni. Chawngte SDO (Civil) Lalneihthanga Colney chuan hmun hima chhungkaw hruaichhuahte hi school-ah leh in ruak remchangah awmtir rih phawt an ni tih a sawi.
Hetihlai hian Lawngtlaia lei tlahniam thin, Lawngtlai-III huamchhung ami chu a chet leh avangin a bulhnaia chhungkaw 17, mi 80 vel chu an inthiarchhuak a. Lunglei leh Lawngtlai inkarah leimin a awm nual bawk a, thenfai mai theih loh chin a awm avangin khualzin tangkhang engemawzat an awm a, Thualthu YMA chuan tangkhangte tan hian an ei leh in tur an lo buatsaih sak a ni.
Tunhnaia Aizawl bakah Mizoram hmun hrang hranga ruahsur kaihhnawiha chhiatna thlenga hmalak mek dan leh bawhzui zel dan tur ngaihtuah pah hian Thawhlehni khan Mizoram State Disaster Management Authority chu an chairman, chief minister Zoramthanga hoin an thukhawm a, ruahmanna hrang hrang an siam a ni.