Chhungkaw sum hman a pung, 2022 aiin 33%-in tam zawk

Chhungkaw sum hman a pung, 2022 aiin 33%-in tam zawk
Indian chhungkuain thla thum chhung (quarterly)-a inchhungkhur mamawha sum an hman chu ‘zawi zawiin’ a pung hret hret a, kum thum kal ta chhunga 33%-a pungin kum 2025-ah hian Rs 56,000 a ni mek niin Worldpanel by Numerator-in thingtlang leh khawpuia chengte sum hman a zir chiannaah tar lan a ni.
Chhungkuaa pawisa hman hi a bik takin khawpuiah kum tin a pung a, thingtlang lamah pawh a pung hret hret tho.
“In chhungkhura sum hman hi zawi zawngin a pung a, kum 2022-a thla thum chhunga hman chawhrual kha Rs 42,000 a nih laiin kuminah chuan Rs 56,000 chuang a ni tawh a. Khawpuia miten an hmang tam zual a, thingtlang lama mite pawh a pung hret hret tho va, ram pumah chhutin a pung a ni,” tiin Worldpanel by Numerator-in Kharcha 3.0 a tihchhuahah tar lan a ni.
Khawpuiah hian thla thum chhunga chhungkaw hman hi June, 2022 khan Rs 52,711 a ni a, March, 2024-ah Rs 64,583 niin March, 2025-ah chuan Rs 73,579 a ni tawh.
Thingtlang chhungkuaah pawh thla thum chhunga sum an hman chu March, 2025-ah Rs 46,623 niin June, 2022 kha chuan Rs 36,104 a ni a. Hei hi chhungkaw 6,000-a chhungpuinute an zawhna atanga an chhut a ni.
“Kuminah hian khawpui leh thingtlangah pawh, sum la lut tlemte thlengin sum hman a pung,” an ti a. “Insensona a pung a, mipuiin an sum lak luh mila khawsak an harsat hret hret,” an ti bawk.
Kum 2025-ah hian sum hman chhuah hi zirna leh leiba rulhnaah a tam zual niin an sawi bawk.
Insenna a tam hian chhungkaw tam tak chuan ni tin mamawh an ngai pawimawh ber a, a dawtah chuan ni tina an mamawh lem loh chu an lei chauh zel a. Mi thenkhat chuan an thil mamawhah pawh an sum neih hman daihzai zawk nan man tlawm deuh zawk an lei phah bawk.
Report-ah chuan mi tam ber chuan an sum lak luhna sa pangngai bakah lak luh belhna tur dang an ngai pawimawhin an ngaihtuah nasa niin tar lan a ni tel.
“A zahve aia tam, 54% chuan an lak luhna sa piah lama an lak luh hi an khawl a, 38% chuan ni tin mamawhah an hmang a, 18%-in leiba rulh nan hmangin 7% chauhvin nawmchen nan leh mamawh loh thil tha lei nan an hmang,” tia tar lan a ni.