Chhungkaw vanduaite vuiliam
Sawrkarin nuai 4 theuhin a ral
Lengpui Airport atanga Aizawl lam an pannaa Lengpui dai maia kawng chhak lung tla in an car a delh avanga nunna chan chhungkaw member pathum chu Thawhlehni khan vui an ni a. Mizoram sawrkar chuan cheng nuai 4 theuhin a ral.
Tarlan tawh angin, Falkland Veng Aizawla in thar an sak hnua an fate chah hawa in thar lawm tum Lalrinliana (67) leh a nupui Lungtiawii (52) hian an fapa an awmpui nen Thawhtanni khan an fapa Dehradun-a lehkha zir mek leh an fanu Singapore-a nurse hna thawk chu thlawhna in an lo haw a, Lengpui Airport atanga an haw lamah chawhnu dar 3.45 vel khan khaw dai maiah lung tla in an lirthei hi a delh a, a khalhtu Lallawmzuala tih loh, midang zawng chu a hmunah an thi. An fanu thi hi Vanlalhruaii (25) a ni. Lallawmzuala hian hliam a tuar a, a vuinaah erawh a tel thei tih thu dawn a ni. An fapa pakhat erawh hi chu midang lirtheiin a haw a, a him thung.
Disaster Management & Rehabilitation minister Prof. Lalnilawma leh Aizawl East-I bialtu MLA, minister Lalthansanga te chuan Falkland Presbyterian Kohhran Hall-a anmahni vuinaah Mizoram sawrkar hmingin ralna sum cheng nuai 12 an hlan a. DM&R secretary K Lalrinzuali leh District Disaster Management Authority Aizawl chairman, bawrhsap Er Lalhriatpuia te an tel bawk.
Chhungkaw vanduaite vuiliam Sawrkarin nuai 4 theuhin a ral
Get real time updates directly on you device, subscribe now.