Chidambaram an Opposition te tanrual duh

Senior Congress leader P. Chidambaram chaun tun hnaia Chhattisgarh leh Rajasthan Assembly inthlana an party chet chhiatna chu ‘beisei loh’ leh ‘ngaihmawhawm’ tiin a sawi.
Chidambaram chuan BJP te chuan inthlan apiang mai chu ‘indona hnuhnung ber’ angah ngaiin an bei a, hei tak hi Opposition tena ‘an hriatfiah’ ngai a ni, a ti bawk.
“State pathum – Chhattisgarh, Rajasthan leh Madhya Pradesh a BJP te chakna hi kum 2024 Lok Sabha inthlan hmaa an party tana phurna nasa tak a ni ang. Chhattisgarh leh Rajasthan-a Congress te chaklohna kha beisei loh thil a ni. A ngaihthat thlak lo va, party leader ten thil fel lo lai an thawm thain ka ring,” tiin Union Finance Minister hlui chuan a sawi.
Veteran leader chuan Rajasthan, Madhya Pradesh, Chhattisgarh leh Telangana inthlanah khan Congress vote share erawh 40% lai niin hei vang hian Congress that tawkzia a pholang a ti bawk a.
Lok Sabha inthlan hmain party vote share chu 45% ah a pun chhoh hman a beisei thu sawiin chu mi tur chuan campaign neih nasat leh vote thlak tur a tam thei ang ber polling station-ah inthlan niah hruai an ngai a ti bawk.
Tun hnaia inthlanna neihah BJP te chuan State pathumah Congress te an hneh vek a, Madhya Pradesh ah sorkar nawn leh Rajasthan leh Chhattisgarh te chu Congress te an chhuhsak bawk a. Congress te chuan Telangana-ah sorkar siam thungin BJP te chu pathumna an ni chauh thung.
BJP te ‘polarisation, anti-Muslim leh anti-Christian propaganda leh hyper-nationalism’ a hlauhawm takzet tiin Congress Rajya Sabha MP chuan sawi pawkin party chuan a beihletna tur an ngaihtuah a ngai a ni a ti bawk a.
“An propaganda te hi hlauhawm tak a ni a. BJP te hian welfare measure (freebies) duh lova an auna an titawp daih tawh. Ka hlauhthawn zawk chu polarisation, anti-Muslim leh anti-Christian propaganda leh hyper-nationalism an kalpui mek hi a ni. Hetiang thilah hian India hmarlam leh central lam ten an thlawp riauin a hriat bawk a. Congress te chuan chhanletna ngaihtuah a ngai a ni,” a ti.
Kum 2024 inthlan atana party in agenda pawimawha a neiha caste census chungchangah Chidambaram chuan, “Issue pawimawh tak a ni a, mahse, a pawimawh ber a ni lo mai thei. Ka ngaihdan chuan unemployment leh inflation te hi a pawimawh ber a ni. Survey neih tinah he issue pahnih te hi mipui tena an ngaihven ber a ni ziah” tiin a sawi bawk a.
Demonetisation, National Register of Citizens (NRC) leh Citizenship Amendment Act (CAA) ten BJP te a tichhia ang em tihchungchangah pawh Chidambaram chuan, “Demonetisation issue chu a hlui tawh a, hlauhna a awm tawh lo. Mahse, demonetisation chungchang hi black money tam tak man reng context in kan sawi tho ang. Tun hnai assembly inthlanah khan ECI in black money an man kha Rs 1,760 crore lai a ni,” a ti a, “Sorkar in kalpui a tum a nih chuan NRC leh CAA te chu issue pawimawh tak a ni ang” tiin a sawi bawk.
Kum 2024 Lok Sabha inthlanah BJP te an chak leh survey neiha rin a nih chungchangah pawh Chidambaram chuan, “BJP hawiin thli a thaw ngei a, mahse, thli chuan a kawng a thlak thei. BJP te hian inthlan an ngaizam ngai lo, inthlan hnuhnung ber tur anga ngaiin an bei vak zel. Hei tak hi Opposition party te chuan an hriatfiah tur a ni” tiin a sawi bawk.
Lok Sabha poll atana INDIA bloc te inbuatsaihnaah Chidambaram chuan alliance leader te chuan BJP te beihna tur seat 400-425 velah candidate intawm an siam ang a ti bawk a.
“Inthlanpui hmain thla thum chauha awm tawh a. Tihtur pawimawh ber chu opposition alliance tena BJP te paihthla tura candidate intawm an siamna tur seat 400-450 vel tihchian a ni” tiin Chidambaram chuan a sawi bawk a.
INDIA bloc in PM atan tu nge an thehchhuah ang tih zawhna pawh Chidambaram chuan, “Inthlan hnuah sorkar kaihruai tur chu thlan a ni ang a. Leader thlanah mipuite ngaihdan a pawimawh ang a, tuna pawimawh ber zawk chu inthlana chak a ni,” tiin a sawi bawk.