Chief minister leh Press Conference
Sawrkar thar hnuaiah ‘kalphung thar’ kan hmu mek a; kalphung thar zinga pawimawh tak chu, chief minister-in Press Conference a ngaipawimawh em em thin hi a ni.
Sawrkar thar lakluhna neih zawh veleh chief minister hian press conference a ko nghal a. Mizoram pawn lama a zin chhuah apiangin a lo haw veleha a ngaipawimawh hmasak ber chu Press Conference a ni bawk.
Chief minister hian eng vanga press conference hi ngai pawimawh em em thin nge a nih, tih zawhna a awm a nih chuan, a chhanna chu – ‘mipui a ngaihpawimawh vang’ tiin a chhan theih ang. Chief minister hian tawngkamin mipui a ngaih pawimawh thu hi sawi duah lo mah se, a thiltihin a lantir chiang thawkhat a tih theih awm e.
India ram sawrkar inrelbawlnaah hian organ pathum pawimawh tak tak, Three Pillars tia koh thin a awm a, chungte chu Legislature, Executive leh Judiciary te a ni. Sawrkar hnuaia awm ve chiah lo, mipui leh sawrkar inkara palai hna thawktu dinhmun pawimawh tak luahtu a awm leh a, chu chu Fourt Pillar tia koh a ni a, chu chu thuthar thehdarhtu press/news media te hi an ni.
Press mite hi mihring ze inang lo tak tak an ni a, qualification pawh inang lo tak tak an ni. Press mite an pawimawh, an zahawm han tih hian, an pawimawhna leh zahawmna kengtu ber chu an dinhmun ‘press mi’ an nihna hi a ni. Chief minister leh minister dangte leh, legislator zawng zawngte pawh hi, an pawimawhna leh an zahawmna chu anmahni mihringah ni mai lovin, mipui aiawha rorel tura thlan chhuah an nihna hi a ni. Press mite pawh press hna an thawh loh chuan an zahawmna leh an thiltih theihna a kiam nghal a, legislators-te pawh an zahawmna leh pawimawhna hi thlan tlin an nih loh chiah hian a kiam mai.
Chief minister-in press mite a ngaih pawimawh chhan chu mipui hnena sawrkar thu puangzartu an nih vang a ni a, chumi awmzia chu mipui a ngai pawimawh a, mipui a dah pawimawh hmasa ber thin tihna a ni.
Sawrkar leh mipui hi langtlang tak leh inpawh taka press mite kaltlanga an indawr theih chuan ramin hma a sawn chak ang tih hi a rinawm a ni.