Chief minister thu thlente leh a behbawm…

Kar kalta Inrinni-a Union Finance Minister Pi Nirmala Sitharaman hova New Delhi-a state leh UT zawng zawnga finance minister ten pre budget meeting an neihnaah Mizoram chief minister Pu Lalduhoma, finance minister ni bawk chuan Mizoram-in harsatna a tawh dan hrang hrangte sawiin rawtnate a thlen nghal a.
Chief minister hian Mizorama ‘change’ thlentir a tum thu sawiin chumi atana mamawh hmasa chu sum leh pai tam zawk a nih thu leh, 2024-25 budget-ah sum tam zawk pe turin Central sawrkar a ngen a; sum dawn tur la dawn kim loh avanga leiba (liability) chinfelna dap sak turin a thlen bawk a. Hei bakah hian 14th leh 15th Finance Commission ten rawtna an siam anga professional tax rate ennawn thuai tha a tih thu te, SASCI sum hman dan tur awlsam deuh zawk duan tha a tih thu te a sawi chhuak bawk a. Sum mamawhte mahnia thawk chhuak turin state dangte angin industry tihtham kan neih bawk si loh avangin ngaihtuah kan ngai hle, a ti bawk.
Chief minister thu thlen hrang hrang atang hian Mizoram dinhmun tlangpui chu a hriat theih nghal mai awm e.
Change hi sawrkar kal tate pawh khan thlentir an tum a, ‘change’ chu a thleng ngei a, mahse ram leh hnam hmasawn duakna tur lam hawi ‘Change’ erawh a ni ngai lo. Tuna sawrkar thar pawh hian ‘Change’ a rawn ti ve leh ngei mai a, mahse central lama thu kan zuk thlen dan hi a ngaihzawnawm chiah em tih chhut ngun a ngai maithei.
Mizoramin sum kan khawhralna lianpui chu ei leh bar atan leh electricity power atan hian a ni a. Ei leh bar tih hian a huam zau a, buh leh bal kan tih buhfai leh a chawhmeh lam thlaite hi a ni a; chumi behbawm chu artui, bawnghnute leh sa chi hrang hrang, sangha, ar, bawng, vawk etc.. te hi a ni.
Sum kan senralna ang hi keimahni ram chhung ngei atanga tha taka kan tharchhuah theih vek a ni a, mahse item tinte hi thenawm state atanga kan chawk luh a tam a, kan sum thawhchhuahsa hi thenawm state-te kan pe hiau hiau reng mai a, chu chu kan hupbeh a ngai. Mi state angin industry kan nei ve si lo tih vel atanga sum fai dil ai chuan, sum chhuak tur hup beh hi ‘Change’ ropui tak a ni mai. ‘Kan thawkchhuak tlem si a’ tia sum dil ai chuan, ‘hei, kan thawkchhuak tam ve bawk a, sum pawh kan chang tam ve tur a ni’ han tih deuh khar khar theih kha ‘Change’ chu a ni mai awm asin.