Chin hnam kara inremlote ZORO-in remna zawnpui

Myanmar-a Chin hnam kara pawl inrem lote an inrem theih nana ZO Re-Unification Organisation (ZORO) hmalak meknaah Nilaini khan inrem lo pawl pahnih – Chin Brotherhood hruaitute leh Interim Chin Nation Consultative Council (ICNCC) hruaitute chu ZORO Pisapui Aizawlah an thukhawm.
ZORO general secretary L Ramdinliana Renthlei chuan, unau kan ni a, inthen thei kan ni lo, indo thei pawh kan ni lo tihah kan chian a ngai hle tih a sawi. “Unau thlahkhat kan nih angin Pathianin engtikah emaw chuan min la suihkhawm ang tih kan ring tlat a. Zofate chu lungrual taka awm kan duh a, kan pawl thil tum a ni a, hei hi remna palai hna kan thawh chhan pawh a ni,” a ti.
ICNCC president Salai Lian Luai chuan remna kawng zawha ZORO-in hma a la chu tha an ti hle a, remna siamsak ngei an duh tih an hria a, remna neih theih nan tan laksak zel turin a sawm tih a sawi a ni.
Chin Brotherhood Defence secretary Timmy Lalliana chuan, remna chungchanga an inhmukhawm chu a bul tanna nise, Zofate inkarah inlungrualna thleng zel se tih chu an duh dan a ni tih a sawi. An ni chuan inlungrual an duh avangin anmahni beitute pawh tumah an beilet ngai loa, Zofate zingah inpumkhatna a awm thei dawn tak tak a nih chuan an nihna thiah vek a, a bul atanga tan that leh pawh an duh tih a sawi a ni.
ZORO chuan Chinland Government /Chinland Council leh Chin Brotherhood /ICNCC inkara inhmuhthiam lohna awm chu an inrem theih nan hma a la zel dawn tih a sawi a. Hun remchang hmasa berah a huhoa inbiakna dawhkan kilpui a tum tih a sawi.