Chin leh Chin inkahnaah ZORO-in palaia tan tum

Myanmar tualchhung buaina kaihhnawiha Chin state chhunga Chin pawl pahnih intihbuainaah ZO Re-Unification Organisation (ZORO) chuan inremna a awm theih nan palai hna a thawk dawn.
Myanmar Chin State-a Chinland Government/ Chinland Council leh Chin Brotherhood chu inhmuthiam loin silai an lek hial a, hei hi ZORO chuan tha ti loin pawi a tih thu a sawi. Unau vek kan nih angin inhmuthiam lo tur kan ni loa, inlungrual taka awm tur kan nih avangin an inkarah remna palai hna a thawk mek tih a sawi a ni.
Hemi bultanna atan Thawhtanni khan Chinland Government hotute an chief minister Pathanga ho leh ZORO hruaitute an president R Sangkawia hoin an inkawm a. ZORO hruaitute chuan, unau kan ni a, inthen thei kan ni lo. Indo thei pawh kan ni lo, tihah hian kan chian a ngai hle tih sawiin, ‘Unau thlahkhat kan nih angin Pathianin engtikah emaw chuan min la suihkhawm ang tih kan ring tlat a. Chuvangin unau indo hi a tha loa, in inrem a ngai a ni,’ an ti.
Chinland Government /Chinland Council hruaitute chuan remna kawng zawha ZORO-in hma a la chu tha an ti hle tih sawiin, an ni chuan an unaute nen inbiak an duh reng a, engtik lai pawhin dawhkan kila inbiak chu an duh dan a ni tih an sawi.
ZORO chuan Chinland Council leh Chin Brotherhood inkara inhmuhthiam lohna awm chungchangah an inrem theih nan hma a la zel dawn tih sawiin, remchang hmasa berah an inrem theih nan a huhoa inbia in dawhkan kilpui an tum tih an sawi a ni.