Chin Lushai Conference champha lawm

Zo Reunification Organisation (ZoRO) Gen. Hqrs. chuan Ningani khan Aizawlah ‘Chin Lushai Conference’ vawi 134-na champha an lawm.
Hmanpuitu Mizoram Legislative Assembly speaker Lalbiakzama chuan, Zofate ramri siam chawpin min daidan rei tawh avangin kan tawng, sukthlek, hawiher, kan ngaihsan zawng chenin a inang lo ta hret hret a. Chutih rual chuan thlah khat, unau chhul khat kual na na na chu kan danglam thui thei tak tak lo, tiin, Zofa leh Zofa unau inkarah inngeih taka awm turin a ngen tih a sawi a ni.
“Kan chehvelah keini aia hnam lian zawkten min hual a. Kan tanho tlat loh chuan nek chep leh chimral theih reng dinhmunah kan ding a ni. Tun dinhmunah rorelna pakhat hnuaiah awm thei rih lo mah ila, tih theih pakhat kan neih chu, thinlung hmunkhat pua awm hi a ni,” a ti a. Zoram mipui pawhin ZoRO hmalakna thlawp turin a sawm tih sawiin, tharum thawh loa Zofate insuihkhawm theihnan movement kal pui zel turin ZoRO a chah tih a sawi bawk.
Speaker bakah hian minister Lalthansanga, MZP president Dr C Lalremruata leh MSU president B Lalkhawngaihzuala ten thu an sawi a ni.
ZoRO adviser, adviser to chief minister (Political) Lalmuanpuia Punte thupui “Inpumkhatna” tih a sawi hawng a. Rorelna pakhat hnuaia awm theih hma chu Zofate inpumkhat zel a tulna lam hawi thurolum (resolution) 7 pawm a ni.