Chin Revolution champha hmang

Myanmar-a Chin Revolution kum 3 tlinna chu July 5 zan khan Aizawlah hman a ni.
Hmanpuitu Mizoram Home minister K Sapdanga chuan, ZPM sawrkar a pian a, an hotuten he mawhphurhna an peka a thawh hmasak ber chu khawchhak lam unaute chibai tura ramria kal a ni, tiin, mahni in leh lo kalsana chenna hrehawm taka an awm leh, naupang tualchai a hmuh khan a lung a chhe hle tih a sawi.
“Mizoram hi ‘Zofate Jerusalem’ tiin kan chhal thin a, inpui nih kan tlin lo hle. Thlaphang taka inpui bela in rawn khawsaknaah kan lo dawnsawn danah che u, tlin lohna tam tak kan nei ang tih ka ring. Kan intodelh loh nak laiin, loh theih lohna avangin min rawn fin a, inbeisei angin kan enkawl zo lo che u tih kan hria a, ngaihdam kan ngai hle a ni,” a ti.
Tuna Mizote harsatna tawh mek chu ruihhlo avanga kan thalai, a bikin mipa kan thi nasa lutuk chu a ni tih K Sapdanga hian sawiin, “Kan hmelma lian tak, ruihhlo hi do tlang ang u. Kan hmalamah hian beiseina sang tak nen zalenna kawl a en theihna turin tawngtai ila, rilru hmunkhat pu in kan pasalthate hrereng chungin zalenna famkim nei turin tang tlang zel ang u,” a ti.
Hmanpuitu dang, adviseto CM (Political) Lalmuanpuia Punte chuan, kum 1994 vel atang khan Myanmar atanga Mizoram lo chhukte buaipuia lo kawm tawh thin a ni a, tun dinhmuna Myanmara Zofate harsatna tawh chungchangah pawh Mizorama pawl hrang hrangin an theih ang angin an lo tanpui a, chutih rualin, hnam hrang hrang innghirnghona a la nasa a, unau kan la indo reng a, hruikhat vuana kan hmelmate kan do loh chuan kan tum ram kan thleng zo dawn lo, tiin a sawi.
Chin Revolution champha hmannaah hian MLA Baryl Vanneihsangi Tlau, Chin State chief minister leh Chin hruaitu dangten thu an sawi bawk.