China-ah McLaren one-two kan thlirliam
Tun season Formula One world championship zet chu vawihnih tlan tawhah champion nawn awn awn mek Red Bull driver chhuanvawr Max Verstappen-a hnehna chang lai hmuh tur a la awm loh laiin a vawihnihna atan McLaren driver bawkin tlankawng a zawh tawp leh hmasaber e, Chinese Grand Prix chu Oscar Piastri pakhatna nih hun a herchhuak a, season bultannaa hnehna changtu a team-mate Lando Norris-a’n a dawt a, pathumna chu Mercedes driver George Russell a ni.
Ti hian, Australian driver Piastri hian a career-ah F1 grand prix hnehna vawithum a chang tling ve ta chiah a, point 34 hum chungin driver standing-ah palina a luah.
Melbourne khaw tlankawng huh hnuaia season bultannaah khan Piastri team-mate Briton Norris chuan pui taka car khalh chungin pakhatna a lo hauh tawh a; China-ah Piastri chak ve lehin, season kal laia vawihnih intlansiak awm tawhah McLaren driver ve vein hnehna an chang a, constructor championship lamah pawh British team hian hma an hruai zui zel.
Shanghai International Circuit-ah Australian driver Piastri chuan pole atangin bul tan mah se a hmahruaina a han hloh hman a, a hnuah insiamthain hun tawp lama brake lama harsatna tawk hlek Norris nen an inum ngial a ni.
Charles Leclerc chuan front wing chhe chungin Ferrari car a khelh pui hle a, Inrinni tlankawng tawi zawka intihsiak hmahruai sprint race-a pakhatna leh a team-mate ni bawk seven-time champion Lewis Hamilton hmakhalh bawk mah se Red Bull driver Verstappen nena palina an inchuhnaah erawh a dingchang zo ta lo a, panganaah thlengin, Briton Hamilton chu parukna a ni.
Nimin result-ah pakhatna luah zo ta lo mah se Norris chuan championship standing-ah point riatin amah hnaihbertu Dutchman Verstappen a kalsan a, pathumna Russell lakah point kuain a sang thung.
China-ah McLaren one-two kan thlirliam
Get real time updates directly on you device, subscribe now.