China-in AP a hmun hming 11 thlak danglam

Indian territory chhunga mi an ram anga chhal a tumna kal zelah Chinese sorkar chuan Arunachal Pradesh-a hmun 11 te chu an hming a phuah thar.
Heng hmun 11-te hming a phuah thar hi map nen tichhuak nghalin Arunachal Pradesh chu southern Tiber region anga sawiin China chuan Zangnan tiin a sawi a, Chinese Ministry of Civil Affairs chuan hming a phuah thar zinga khaw pakhat chu Arunachal Pradesh capital Itanagar bul lawka awm a ni bawk.
Tun hi Beijing-in Arunachal Pradesh ram chhunga hmun hming a thlak tum thumna ni tawhin ‘standard geographical names’ tiin a sawi a. Kum 2017 khan Chinese Ministry of Civilian Affairs chuan hming paruk a lo thlak tawh a, December 2021 khan hmun hming 15 a thlak tawh bawk.
Tuna hmun hming a thlakna hi April 2 khan tichhuakin ‘State Council on the management of geographical names, (China’s Ministry of Civil Affairs) chuan southern Tibet a hmun hmingte thlakna a nei a. Southern Tibet-a mipui tena an hman zui tur hming thlakna hi tum thum kalpuina a ni,” tiin official-in a puang zui a ni.
Hmun hming 11 a thlakah hian tlang panga a awm a, hmun lun tak pahnih awmin ram hmun pahnih leh lui pahnih a tel bawk a. Heng hmun geographical area-te hi India ram chhunga awm leh India-in a enkawl te a ni. China chuan heng hmun hmingte hi Mandarin, Tibetan, Pinyin (English transliteration) ten tarlangin an awmna hmun diktak Latitude leh Longtitude te tarlanna nei vek bawk a. Map tihchhuah thar chuan Arunachal Pradesh hmun tam zawk chu Zangnan, south Tibetan Autonomous Region tia sawi bawkin hei hi China chuan Zizang tiin a ko thung.
India Ministry of External Affairs chuan Beijing hmalakna thar ber hi chhanna emaw a la siam lo va, mahse, a hma chuan Beijing in heng hmun hming thlakna a neihte hi a hnawl leh pawm loh thu a sawi thin thung a.
“Arunachal Pradesh hi India ram bung a ni a, a ni reng bawk ang. Arunachal Pradesh-a hmun hming duh duha lo thlak danglamin engmah a thlak danglam dawn lo” tiin Ministry of External Affairs thupuangtu Arinda, Bagchi chuan kum 2021 khan a lo sawi tawh a. Kum 2017 leh 2021 khan Chinese Foreign Ministry chuan China-in ‘Zangnan region’ a ram anga a chhal te hian ‘historical leh administrative basis’ a nei tiin a sawi tawh thung.
India Ministry of External Affairs chuan China-in hetianga hmun hming a thlak hi China-in ram lak a tumna leh international court-a kal palha chan tha a chan theih nana a ruahmanna tiin a lo sawi tawh a. Mahse, China hmalakna chuan a tak takah danglamna siam rin ni lo thungin Arunachal Pradesh ram chhung mai bakah hian Beijing chuan a hma pawhin South China Sea leh East China Sea lamah hetiang hian hmun hming thlakna a lo kalpui fo tawh bawk.
China hian Doklam a Indian leh Chinese sipaite inbeihna thlen kumah hmun hming thlak tum khatna a puang a, a tum hnihna chu April 2020 khan Indian Army leh PLA te LAC a an inbakkaihin a puang leh a. Kha mi hnu khan military commander-level ah inbiakna tum tam neih zui niin chuti chung chuan ramri ah China sipaite chuan chet an la reng tia sawi a ni bawk.
December 2022 khan Defence Minister Rajnath Singh chuan parliament-ah Chinese PLA sipaite leh Indian Army te chu PLA sipai tena Tawang sector-a Yangtse post lak an tum avangin an inbakkaih thu sawiin mahse Chinese sipaite chu Line of Actual Control (LAC) pelhah an nawrlet thei tiin a sawi a.
Chu chu India-in official level-a sawi a neih hnuhnun ber niin tun thla hian China Defence Minister thar General Li Shangfu chuan India tlawhin SCO Defence Ministers’ meeting-ah a tel dawn a, hei bakah hian Chinese Foreign Minster Qin Gang chuan May thlaah SCO Foreign Ministers’ meeting-ah tel turin India a lut dawn bawk.
Kum 2020-a eastern Ladakah a inbakaihna thlen hnuah India chuan Arunachal Pradesh bikah ralthuam tam leh tha zawk a chhawpchhuah phah tawh bawk a, a bik takin Tawang sector-ah a inbun thar nasa zual a, infrastructure lam tihhmasawnna pawh eastern Arunachal lamah nasa taka kalpui a ni zual bawk.