China-in Bhutan urhsun takin sawm

China-in Bhutan chu inlaichinna tha zawk siam puiah sawmin ram pahnih inkara ramri buai chungchang a harsatna awm te ching fel tur leh a rang thei ang bera inthenawm ram pahnih te dan hnuaia inlaichinna tha zawk siam turin a sawm a ni.
Thawhlehni khan Bhutan Foreign Minister Dr.Tandi Dorji chuan ramri chungchang sawi turin Beijing tlawh in China Vice President Han Zheng a hmu a, Han chuan ramri inthen dan tura hmalak chu remti in ram pahnih ten inlaichinna tha zawk an neih theih dan tura hmalak chu tha a ti hle a ni.
Han chuan China leh Bhutan chu inthenawm thian tha tak an ni chung siin ram pahnih te hian inpalai tawnna hmangin inlaichinna hun rei tak an la siamlo a ni a ti.
Han chuan, “China hian Bhutan ramin mahnia ro a inrel te, zalenna a neih te leh a ram chhung hmun hrang hrang inzawm khawm te hi a zah sak em em a.
Chutiang zelin eng thilah leh eng chenah pawh nise an inthleng tawnna tih chak hi a duh a, ei leh bar zawnna kawngah te, insumdawn tawnna te, culture leh tourism-ah te a tak taka thawhho pawh a duh rengin ramri inthen dan tur mumal zawk siam leh ram pahnih mipui ten an lo hlawh pui theih zawk nana palai hna hmanga inlaichinna tha zawk siam hi China chuan a duh reng a ni” tiin a sawi a ni.
Dorji ve thung chuan Han chu hrilhin Bhutan sorkar chuan China nena inlaichinna tha zawk neih a pawimawh zia leh one-China principle chu nghet taka an zah sak thu a hrilh a. China ram news agency Xinhua sawi danin ram pahnih te hian tihtakzetin an ram inrina siam that leh ram pahnih te inkara inpalai tawnna siam chu an duh takzet thu thuchhuah a siam a ni.
Thawhtanni khan Chinese Foreign Minister Wang Yi chuan Dorji nen meeting an neihna ah ram pahnih te inkara inpalai tawnna neih leh chu ram pahnihte tan vek hun rei tak atan a tha dawn a ni tih a lo sawi tawh a.
Wang chuan, “Ramri chungchanga inremna siam leh ram pahnih te inkara inpalai tawnna siam chu hun rei tak chhung atan China leh Bhutan tan a thain Bhutan ramin chhungril takin a hlawkpui dawn a ni” tiin a sawi. Chinese Foreign Ministry thu puangtu-in a sawi danin Dorji chuan Bhutan hian one-China policy-Taiwan leh Tibet chu China ram pakhat an nih hi nghet takin a pawmin ramri chungchang chingfel tur leh ram pahnih hruaitu ten in palai tawnna hmanga inlaichinna siam vat hi a duh a ni, tiin a sawi a ni.
China leh Bhutan hian inpalai tawnna hmanga inlaichinna hran nei lovin engemaw changa ram hruaitu te intlawh tawnna an neih thin hi a ni mai a. Beijing hian a thenawm ram 12 te nen ramri buai an chinfel tawh laiin India leh Bhutan te hi China-in ramri chungchanga inremsiamna a la neih pui tur awm chhun te an ni. Kum reilote kal ta ah khan Beijing chuan hmanhmawh takin ramri buai lai Doklam chu Thimpu-in ka ram a ni tiin chhal mahse China chuan hemi neih tum hian inremsiamna neih pui vata inlaichinna tha zawk siam pui a lo tum tawh a.
Kum 2017-a China-in Doklam tlanga kawngpui sial a tum avangin India leh China te chu an lo innghirngho phah tawh bawk a ni. India hian ram pathum te inzawmna lai Doklam-a kawngpui siam hi a duhlo hle a, Siliguri kawtchhuah leh India hmar chhak te thlun zawmtu Chicken Neck an tih mai te he kawng hian a hnaih dawn em avangin India ram venhimna kawngah harsatna a siam thei dawn a ni. India leh China te inepna hi Beijing-in kawngpui a siam tumna a thulh vang chauha reh a ni.
Kum 2020-ah pawh khan China hian Global Environment Facility (GEF) Council-ah Bhutan rama Sakteng Wildlife Sanctuary chu a ta ang maiin a chhal a, mahse China sum thawh chu Bhutan chuan a lo duhlo a ni. China-in Sanctuary a rawn chuhpui duhlohna hi India rama China Embassy-ah Bhutan chuan a lan tir a ni.