China-in Russia hnenah ralthuam pek tum ti

Ukraine indona kal mek zelah China-in Russia hnenah ralthuam leh a kaihhnawih thil pawimawh te pek dan tur a ngaihtuah mek, tiin US Secretary of State Antony Blinken chuan a sawi.
Blinken chuan CBS News hnenah Chinese company te chuan Russia hnenah ‘non-lethal support’ an peksa tawh thu sawiin information an dawn thar berah ‘lethal support’ pawh pek an tum nia ngaih a nih thu a sawi bawk.
Hei hi China tan chuan ‘nghawng na tak nei tur’ a ni ang tiin Blinken chuan China chu a vau lawk zui bawk a. China erawh chuan Moscow-in military equipment a dil nia sawi chu a hnawl thung.
Chinese President Xi Jinping hi Russian President Vladimir Putin nena inkawmngeih tak niin China chuan tun thlengin Russia-in Ukraine a run chu demna thu a la sawi ngai lo va, neutral nih thlangin inremna awm se a duhthu erawh a sawi thung.
China foreign ministry chuan ‘amah kawh bik’ leh Russia nena n inlaichinnaah US-in a ‘nawrluih’ emaw chu a ngaithei dawn lo tiin a sawi lawk zui nghal bawk a.
Heng thute hi Blinken hian kar kalta Inrinnia Munich Security Conference neih zawh hnua China top diplomat Wang Yi nena inbiakna an neih hnuah CBS ten an kawmnaah a sawi a ni.
Meeting an neihnaah Blinken chuan ‘China-in Russia hnenah ralthuam hlauhawm pek a tum theihna’ chu an ngaihven tak meuh meuh tia a sawi thu a sawi a.
“Vawiin thlengin Chinese company ten Ukraine-a Russia hman turin non-lethal support an pe tih kan hria a. Kan ngaih pawimawh zawk leh information kan dawn ang chuan lethal support pek a tum niin kan hria a ni” tiin a sawi.
US-in information a dawn kimchang a sawi lo chungin China chuan Russia hnenah hian primary weapons bakah ammunition a pe mai thei a ti bawk a.
Blinken chuan, “China-ah hian a tak takah chuan private company leh state company a awm hrang tak tak chuang lo,” tiin a sawi zui bawk.
China hian Russia hnenah ralthuam a pe a nih chuan ‘ram pahnih te kan inlaichinnaah harsatna nasa zawk a thlen dawn a ni’ tiin Blinken chuan a sawi a.
Washington leh Beijing inlaichinna hi US-in Chinese spy balloon nia a ngaih a kahthlak avangin a chhe zual sa tawh a. Ram pahnih te chu tawngkam feikibarin an insai tawn tawh a ni.
Mahse China-in Ukraine a Russian force te hman tura ralthuam a pe a nih gnat chuan US-Chinese inlaichinna chu nasa zawkin a chhe ngei tura ngaih a ni chiang sa thung a. Hei vang tak hian Blinken hian China chu a vau lawk anga ngaih a ni bawk.
Blinken chuan China chuan Western ram te hrekna avanga Russia talbuai tur chhawmdawl nan China chuan a pui tiin a sawi bawk a. China chuan nasa zawkin Russian oil a chawlut reng a, Russian oil, gas leh coal chawlut hnem ber a ni mek bawk.
Hetih lai hian Nato ram te chuan ralthuam hrang hrang Ukraine hnenah an pe lut thung a, chung zingah chuan tank pawh a tel a, fighter jet em an la pe lo tih mai chauh niin Blinken chuan US chuan fighter jet a pek leh pek loh turah thutlukna a la siam lo a ti zui bawk.
Khawthlang ramte chuan Ukraine-in thla lo awm tura Russia in nasa zawka chetlakna a neiha lo dang thei tura puih an ngai a ti thung a. Russia hian Ukraine khawchhak lam chu nasa zawka beih a tum mek nia sawi niin helai hmun hi indona nasa ber bera kalpuina hmun a ni bawk.
Hetih lai hian Wang chuan Moscow tlawh a tum thung a, Wang chuan Munich Conference neihnaah China chuan Ukraine indonaah tan lam a nei lo tiin a sawi a.
China chuan buaina thleng mekah a dinna chiang taka sawina document a tihchhuah vat tur thu sawiin he document-ah hian ram tinte territorial integrity chu zahsak tur tia an ziah lan thu erawh a sawi thung a.
“Kan thiante abik takin Europe amite chu he indona tihtawp a nih theih nan hian ngaihtuahna tha tak seng turin ka ngen duh a ni,” tiin Wang chuan a sawi a. “|henkhatte he idnona tihreh duh lo emaw leh inremna siam duh lo an awm mai thei,” tia sawi thungin, chungte chu tute nge tih erawh a sawi lang si lo thung.
Hetih lai hian Chinese President Xi chuan Zirtawpni February 24 khian Russia-in Ukraine a run kum khatna chiahah ‘peace speech’ a sawi dawn tiin Italy foreign minister Antonio Tajani chuan a sawi thung.
Munich Conference neih laiin Blinken leh Wang te pawh na takin tawngkain Chinese spy balloon kahthlak chungchangah an inbei bawk a. Blinken chuan US chuan a sovereignty tichhe thei lakah dimdawina a nei hauh dawn lo tiin a sawi bal a. CBS tena an kawmnaah pawh khawmualpui panga laiah China chuan balloon hmangin enthlakna a kalpui a ti bawk.
Wang erawh chuan balloon spy chungchang chu US-in politics thila inbumna a hmuhchhuah tia sawiin leh China kawng engkima rahbeh a tumna kal zel a ti thung a, Balloon te chu China-in enthlak nan a hmang lo a ti bawk.