China-in Ukraine leh Russia-ah ralthuam pe lut lo ti

Ukraine crisis chu ‘invisible hand’ avangin awhrei tir leh nasa zawka buainain a umzui zel a ni, tiin China foreign minister Qin Gang chuan a sawi.
“Invisible hand” hian Ukraine crisis chu geopolitical agenda dang te kalpui remchan nan a hmang, tiin Qin chuan Beiking a annual parliament meeting neihnaah sawiin a rang thei ang bera inremna siam tura inbiakna neih ngai tiin a sawi.
“Inbeihna, hrekna leh nawrnain harsatna a sukiang dawn lo. A rang thei ang berin remna leh muanna a awm theih nana inbiakna kalpui tur a ni a, a kaihhnawih tin te security chu ngaih pawimawha zah ngei tur a ni,” tiin Qin chuan a sawi bawk.
Qin an sawi a neih hi Ukraine indonaa Beijing leh European Union inkara boruak awm nasat mek laia China dinna sawifiahna anga ngaih a ni a, China chu Ukraine buainaah mediator ang tak taka awm duh lova puh niin a chhan berah pawh Russia chu thiam lo zawka a sawi duh tlat loh vang a ni.
Hei bakah hian Qin chuan Beijing chuan Ukraine buaina kal mekah Ukraine emaw Russia hnenah emaw ralthuam pek a neih loh thu a sawi nghal bawk a. China hi a hmain US official te chuan vau lawk nghalin Russia hnena ralthuam a pe a nih phawt chuan a nghawng na tak a tuar ang an ti lawk a ni.
“He buainaah hian China a tel ve lo va, khawi ram ve ve pawh ralthuam a pe hek lo. Hei vang hian China hreka vau ngawt chu thil dik a ni lo va, pawm theih a ni hek lo,” tiin a sawi.