China-in US nena inlaichinna tha neih a duh
China chuan US nena sumdawnna lama indo a duh lo tia sawiin, US-a Chinese ambassador chuan US-in technology leh trade lama a hrek zui zel a nih chuan a chhang let ang tiin a sawi thung.
Ambassador Xie Feng chuan US chuan microchips leh chipmaking equipment te China hnena hralh khapah puhin hei hi Beijing chuan China ‘hmehbeh’ tumna anga a ngaih tiin a sawi a.
“China hian inelna a hnawl ngai lo, mahse, US-in inelna a sawifiah dan hi chu a dik lo a ni,” tiin Xie chuan Aspen Security Forum-ah a sawi a. “United States hian China hmehmih a chak a tum a ni,” tiin US in Chinese telecommunication giant Huaweu te hnena security chhuanlama technology a hralh duh loh chungchang a sawi a.
“Hei hi tui inhleuhsiaka midang te swimwear hlui tawh hak tira mahniin Speedo hak hlauh si ang vel a ni,” tiin a sawi bawk.
Tun thla tir khan China chuan computer chips leh solar cell siamna lama metal pawimawh pahnih te chu US-in microchips hralh a thunun chhanlet nan thawnchhuah a khap zui a. Kumin kumtir lam khan Beijing chuan an ramah US memory chip siamtu lian ber Micron Inc te product hralh a lo khapsak tawh bawk.
“Ha aiah ha, mit aiah mit tia kal kan duh lo,” tiin Xie chuan a sawi a. “Trade war emaw technological war kalpui kan duh lo. Iron Curtain emaw Silicon Curtain tihte hi mangtha kan duh zawk,” tiin a sawi bawk.
Tun hnaiah Washington leh Beijing te chuan inlaichinna siamthat tumin hma an la a. Kumin kumtir lama Chinese spy balloon US territory a hmuh a ni leh kahhtlak zui bakah China-a human right chungchang te leh Taiwan leh South China Sea chungchang te chuan ram pahnih inlaichinna a tichhe hle a ni.
Tun hnai lawkah US top official pathumte chuan Beijing tlawh thungin an zingah John Kerry, US special envoy on climate pawh telin Chinese official-te nen climate change beihletna chungchang an sawiho a.
A hma lawkin Treasury Secretary Janet Yellen chuan China a tlawh tawh bawk a. Thla kalta khan Secretary of State Antony Blinken pawhin China a lo tlawh tawh bawk a. Xie chuan China-in US nena inzawmna tha neih a duh takzet tiin a sawi zui bawk.