China leh Philippines te chuan South China Sea-a tuipui ram an inchuh avanga inngurna an neih thin te tihtawp a nih theihna turin inremna an siam tiin Philippine sorkar chuan a tarlang.
Philippines chuan Second Thomas Shoal a luah chu China-in a ram angin a chhal bawk a, hei vang hian tun hnaiah ram pahnihte inkarah inngurna nasa tak thlengin chu chuan zau zawka buaina a thlen hlauhna a lian hle a ni.
He Shoal hi Filipinos te chuan Ayungin an ti a, Chinese te chuan Ren’ai Jiao an ti ve thung a. Philippines leh Chinese diplomats te Manila inbiakna neite chuan he shoal chung changah hian inhriatthiamtawna inremna an siam thei ta a ni.
“Ram pahnihte chuan South China Sea a boruak tang tur tihnep a ngaihzia hriain chu chu inbiakna leh inrawntawnna hmangin South China Sea chungchanga kan dinna chungchangah sawihona neih zel ni se kan ti,” tiin Manila a Department of Foreign Affairs chuan a tarlang a.
China Ministry of Foreign Affairs pawhin Philippines ten Ren’ai Jiao chungchangah Philippines nen inremna lailawk kan siam a ni an ti bawk a. Ram pahnih te hian inremna thuthlung an siam an thehdarh lo ve ve thung.
China hian ram leh sea border-ah a thenawm hnaih te nen South China Sea-ah inchuhpui a nei deuh vek a. Tuna Philippines nena inremna an siam hian ram dangte nen pawh inbakkaih kher lova ram inchuhah te inremna siam a nih theih beiseina a siam hle a ni. Mahse, tuna inremna an siam chu a taka kalpui hlawhtlin a ni ang em tih chu beiseina nena thlir mek a ni.
He shoal hnaiah hian Filipino navy te chuan outpost neiin chuta mamawh eitur leh supply hrang hrangte pekna chu Chinese coast guard ten an dang chat thin a ni. Nikum atang khan he shoal inchuhna hi a nasa zual bawk a.
June 17 khan Chinese coastguard te chuan supply pe tur Philippines navy boat te manin an tihmelhem nasa hle bawk a. M4 rifles te pawh mansakin Filipino navy personal ten hliam an tuar nual bawk a ni.
United States leh Japan leh Australia te chuan Chinese navy te chet dan chu an dem thu sawiin South China Sea ah rule of law leh freedom of navigation kenkawh a ngai an ti bawk a. South China Sea hi global trade route pawimawh lutuk a nih mai bakah sangha tamna leh a tuihnuaia gas deposit tam tak awmna a ni bawk.
Philippines mai bakah hian China chuan Vietnam, Malaysia, Brunei leh Taiwan te nen pawh tuipui ram inchuh an nei tho bawk a ni. Souh China Sea pumpui deuhthaw hi China chuan a ram anga chhalin chu chu United States chuan duh lo hle in kum tam tak South China Sea-ah hian freedom of navigation humhim nan tiin indo lawng lian a dah tawh a, chutak chu China chuan a haw em em thung.
China leh Philippines inrem
Get real time updates directly on you device, subscribe now.
Prev Post
Next Post