China map tharah Arunachal rin lut
China chuan ‘standard map’ 2023 edition tichhuakin chutah chuan Arunachal Pradesh leh Aksai region te chu a ram angin a rinlut a ni.
He map hi August 28-ah tihchhuah niin chutah chuan Arunachal Pradesh chu China chuan South Tibet tiin kum 1962 indonaa Aksai China luahchin pawh a ram angin a rin lut bawk a. Taiwan leh South China Sea a inchuh hmun te pawh map tharah hian Chinese territory anga tarlan a ni bawk.
Map-ah hian China chuan nine-dash line a ta anga a ngaihna tichiang nawn lehin South China Sea tam zawk chu a ram angin a chhal zui bawk a. Vietnam, Philippines, Malaysia leh Brunei te chuan South China Sea area te chu an ram tiin an chhal ve theuh bawk.
He map thar hi China-a Ministry of Natural Resources te chuan Surveying and Mapping Publicity Day leh National Mapping Awareness Publicity Week, Deqing county, Zheijiang province a neihah an phochhuak tiin China Daily newspaper chuan a sawi a.
Tun hnai lawkah India Prime Minister Narendra Modi leh Xi Jinping te chuan BRICS summit neihna Johannesburg, South Africa ah inhmuhna an nei thung a.
Foreign Secretary Vinay Kwatra chuan PM Modi chuan Xi Jinping hnenah Wsyern Sector, India-China border areas a Line of Actual Control a harsatna chinfelloh awma India ngaihmawh te a hrilh thu a sawi a.
“Prime Minister chuan border area ah remna leh muanna leh boruak sosang lo siam a ngaia India-China inlaichinna that nan LAC zahtawn a ngai a ti a. He thilah hian ram pahnih hruaitute chuan official te ve ve chu ramri a boruak muanawm a awm theih nana hmala tura hrilh an rem ti ve ve a ni” tiin Kwatra chuan a sawi a ni.
Chief planner of China’s Ministry of Natural Resources, Wu Wenzhong thung chuan surveying, mapping leh gepgraphical information te chu ram tihhmasawn nana pawimawh tia sawiin natural resource enkawl nan te leh ecology leh civilization siam nan te a pawimawh tiin a sawi thung a.
“Kan tihleh tur chu geographic information data te heng digital maos leh navigation leh positioning te tihchangltun niin chutah chuan location-based services, precision agriculture, paltform economy leh intelligent connected vehicles te tihchangtlun a keng tel nghal a ni” tiin Wu chuan China Daily hnenah a sawi.
China hian ramri buaina a thenawm ram tin te nen a nei emaw tih mai tur niin Chinese Communist Party, CCP , Xi Jinping kaihhruai chuan China ram tihzauh nan tactic hrang hrang hmangin an ram tihzauh nan international norms te pawh an zah lo hle bawk.
China chuan Arunachal Pradesh chu a ram anga a chahlah greater Tibet huamchhuang a ti a. Kumin April thla pawh khan India ram chhunga hmun 11 lai tlang, luitui leh residential area te chu hming thar a vuah bawk.
Kum 2017 leh 2021 pawh khan China Civil Affairs Ministry chuan India rama hmun thenkhatte chu an hming a vuah thar tawh bawk a. New Delhi chuan China expantionist plan chu nasa takin a sawisel tawh a. New Delhi chuan Beijing chu a ram ni miah lo te pawh a ram anga rinluta harsatna siam tumah a lo puh tawh a ni.