Chinah-ah Sinner a champion

Tennis hmanga inelna China Open 2023 chu Nilai zan khan mipa final khelh a ni a. Inkhel hmuhnawm takah Jannik Sinner chuan a khingpui Daniil Medvedev chu set hloh lovin a hneh, ropui takin a champion.
Italin Sinner hi Rusian Medvedev lakah vawi ruk ngawt a tlawm zawn tawh vangin final ah chak tura rinkai a ni phak lo. Semi-final ah champion tura rinkai Carlos Alcaraz a vuaktlak hnuin a khel tha chhunzawm a, final hautak takah set hloh lovin a chak ta nawlh.
Final ah hian Sinner leh Medvedev te hi an inhnehtawk viau a, game an inlakchhawk zak zak. Sinner hian break theihna hun remchang nei thin mah se a chhawr ?angkai thei bik lo a, tie break khelh a ngaih phah. Tie break ah erawh a chungnung viau thung a, set khatna a la phawt.
Set hnihnaah pawh an inhnehtawk zui viau a, break an neih theih loh ve ve hnuin tie break khelh a ngai zui leh a. Set khatna ang thoin Sinner a chungnung zui leh a. Inkhel hmuhnawm takah 7-6 (7-2), 7-6 (7-2) in a chak a, a champion zui ta a ni.
China Open champion thar Jannik Sinner hi World No. 6 a ni mek a. ATP Ranking tihchhuah tharah No. 4 ah a kaisang dawn a. Hei hi ATP ranking-a a thlen san ber tum a ni dawn nghe nghe.