Dr Keihawla Sailo
Falkland
Mob- 9436142327
-- Advertisement --
Thiam Thu reng reng sawi ve lotu, Pu K Lalhmingliana, Speaker El-Bethel Evangelical Team hovin Tlaiberh Lung ni 12.1.2004 khan kan phun a. Granite a la chhuak lova, lung lian deuh pawh hmuh tur an la zuar si lova, lung tereuhte hi kan phun a. “Duat lai, Tlaiberh”, ti ringawtin kan ziak a. Beisei phak loh, Pu K Lalhmingliana a lo tel thei a, ani chuan, “Tlaiberh lung in phun dawn chuan, a ziak dan tur hla ka lo siam ang e”, a ti a. Chu chu:-
BERHVA LENGHERMAWITE
Nungchate Paradis-ah par tin zu dawn a,
Hlim zai i vawr lai taka, hringmi nunrawng,
Chengrang chawi vang maw,
Thlafam i chan tak mai le!
I zui lai di, aw, nau ang tap leh
Paradis huanpu thinlai nâ
Dawi ang dawm thiam awm tak ang maw?
“Tun hnuah hetiang hi thleng tawh lo se,” kan ti.
Nau ang nun mawl hi,
Hmatiang chhawn zai rel ve rawh, Vala.
January 2004 K. Lalhmingliana
Speaker
El Bethel Evangelical Team
tih hi a ni a. Mi pawh 300 lai kan kal khawm a.
A duh ang chuan kan puitlin thei ta si lova, tawitea ziak chu a han haihawng ta a. “A ziak dan tur hi hla ka siam a, tawi fel taka in lo ti thei hi a tha e,” a ti a. Champhaia a haw chho chu rei lo teah a thi ta mai si a. A thih hnu kum khatah a duh ang thlapa ziakin, a nupui hovin a dang kan phun leh ta a. Kum 10 lai ral hnuin Granite lung tha a lo awm ta a, chu chu Mistiri nen kan pahnih chauhvin kan phun ta a ni. Tlawmna nun kawng ni maw?
Tlaiberh lung phun dan chanchinbu leh TV-a chhuak a lo hmuhin, Pu Sangliana, Sialsuk Zawlnei, Middle School Headmaster rilru a khawih nasa mai a. Pathianin, “I leipui vauah Chingpirinuin no a nei a, chu chu la la, hlutpui nan Nungchate Paradis-ah va chhuah rawh”, a ti a. Ani chuan “Chingpirinu no chu rul leh sazu a chaw a ni a, a puitlin hmain a thi mai anga sin!” a ti a. Pathian chuan, “A nih leh hlutpui nan Rs 200/- huan neitu va pe rawh”, a tih avangin min rawn zawng chhuak a, min rawn pe ta mai a. Kei chuan mak ka ti lutuk a, “Sorkarin cheng nuai khat emaw nuai sawm lai pawh min pe se, chu ai chuan ka lawm zawk ang”, tiin ka lo dawngsawng ta a. Kum 20 lai a ni tawh, tunah chuan cheng sang hnih vel laia hlu a nih a rinawm. Chu cheng za hnih chu hmang phal lovin, inlengte kawm nana hmangin thingremah ka khung reng mai a ni.
Nugchate Paradis huan mawnga nungchate ruangbualna dil kan khuah laiin zeria hlawhfa pakhatin Chingpirinu ruang, polythene ip chhunga an tuam hlawm, an kah thlak ni ngei tur hi a hmu a. Kan huana zan tin hram thin kha, a reh ta daih mai a. “Tlaiberh lung mah kan phun a, Chingpirinu lung i phun ve ang u”, tiin El-Bethel Publication Board member-te hnenah ka sawi a, tha an lo ti em em mai a. Pu Lalthanchhunga, Board Editor chuan, “kan puitlin theih dawn chuan, a ziak dan tur chu ka lo ngaihtuah ang e”, a ti a, a sawi ang chuan Jun 15,2023 khan kan phun ve leh ta a.
Chingpirinu ruang chu kum 2021-a Nungchate Paradis dil khuahnaa ip chhungah thia hmuh a ni.
Tlaiberh lung phun khan Sialsuk a va deng a, chumi sawhkhawk chuan Nungchate Paradis a rawn deng leh ta niin El-Bethel Publication Bourd chuan kan ngai a ni.
A thih hma chuan, zanah hian a hram dut dut thin a, a ngaihnawm tehlul nen, khua a tihar ngei mai. Huan chhung atangin rul lian deuh maite hi a thlawh chhuahpui nul nul mai thin zu nia.
He huan hlutpuitute chu, Governor, Minister, Pastor 5, IAS 3, MCS 5, Doctor 3, Engineer 2, mi langsar tak tak, El-Bethel Speaker te, Pu R Thangmawia te, Pu R Zamawia te, Peon, Driver etc. mi 300 lai, huana thing phun a, sava chhuahtute an ni.
Chutih laia a suasamtute mi tlema zawng an awm hi chu innghaihtuah harh se a duhawm hle.
Thil siam zawng zawng te chuan, beisei em emin, Pathian fate lo lan an nghakhlel hle si a. Rom 8:19.
Chingpirinu Lungphun chu B. Kholhring Youtube atangin lo bih chiang ve turin chhiartu zawng zawng kan sawm a ni e. Pu Sangliana nupui Pi Tleipuii awka ngei lo ngaithla ve teh u.