Chipuite tawrh ai tuar ngam CM kan nei – R Lalzirliana

Mahni chipuite tawrh ai tuar ngam chief minister Pu Zoramthanga kan nei chu Zofate kan vannei hle tih MNF minister R Lalzirliana chuan a sawi.
Thawhtannia MNF Tawi East block media & political training, Keifanga neih hmanpuitu MNF adviser R Lalzirliana chuan party zinga nationalist ber, India pawh kap ngam MNF sawrkar laiin Pathianin thil ropui tak min tihsak a tum nia a hriat thu sawiin, “Kan chipuite tawrh ai tuar ngam chief minister Pu Zoramthanga kan nei hi Zofate kan vannei hle a. Hun khirh tak tun term chhunga kan tawhah kan hotute chak hle lo se tun ai hian kan tlachhia ang,” a ti.
Ram leh hnam chhanna kawngah huai tur a ni tia sawiin, “Kan huai ngam lo a nih chuan kan dik tawk lo tihna a ni. Kan dik chuan tanpuitu kan nei mai zel. Tuna Manipur buainaah an sawrkar leh official lamte an demawm hle a. Manipur Zofate khi Meitei rama awm an ni loa, hmakhawsang atanga an lo awm tawhna a ni zawk. Kan humhim tlat a ngai a ni,” a ti.
Politics-ah chuan mahni inhmuh dan aiin midang min hmuhdan a pawimawh ber tih R Lalzirliana hian a sawi a. Party leh pawl hrang hrang kalkhawm ZPM chu an inrelbawl dan a mumal lo hle tih a sawi. “An chief ministerial candidate ber pawh party-a a dinhmun a chianglo. Party president a nih laiin ban a tawk tawh a, MP a nih laiin ban a ni tawh bawk,” a ti. ZPM chu an sawi dan angin an awmlo zel tih sawiin, an MLA-ten an lirtheiah designation plate an tar ve tho bakah hlawh leh hamthatna dang pawh an insawi ang niloin, midangte lak ang tho an la ve mek tih a sawi. “Sum hmachhuan ve lo tura insawi chungin sum an khawn a, sum thianghlim leh thianghlim lo thliar loin a neinung deuh nia langte an sawm lut mai thin. Sawrkarna siam ta se, an sechal kal ngalh ngalh ang,” a ti bawk.