Chite Venga Tourism hmalakna bialtu MLA leh vengmite hrilhfiah

Mizoram Tourism department kaltlangin Chite Vengah ‘Pilgrimage Facilitation Centre’ sak mek a ni a. Sakhaw thil leh thildangah mipui hman theih tur niin, he Centre sak mek chungchanga hriat tur awmte chu bialtu MLA ruahmanna in inhrilhfiah a ni.
Aizawl East II bialtu MLA, minister B Lalchhanzova chuan hmasawnna ruhrel emaw sawrkar programme emaw kalpui a nih dawnin, a nghahna hmun amiten a tam thei ang berin hria in hmelhriat thin se a duh tih a sawi a. Hei hian mipuiin sawrkara rinna an neih lehzual nan pawh thil tangkai tak a ni tih a sawi. A bial chhunga hmasawnna hnathawh chu mipui aiawh a nih angin a hriatchian hle a ngai a, a chhiat a thatah mawh a phurin mipui aiawha hma hruaitu tur a ni a, a bial chhunga hmalakna thil dang pawh an review chhoh zel tur thu a sawi bawk.
Tourism hotute sawi danin, Pilgrimage Facilitation Centre hi sawrkar laipui scheme – Pilgrimage Rejuvenation and Spiritual Heritage Augmentation Drive (PRASHAD) hnuaia thawh a ni a. Sakhaw thila punkhawmna, open area leh len thawvenna hmun a awm dawn. A sak nan cheng vaibelchhe 31.49 hmuh a ni a. Art and Craft Centre, Handloom Centre, Multi Utility Kiosks, open area leh Pilgrimage Congregation area bakah mipui tana hman tangkai theih thil engemawzat a awm ang.
Minister B Lalchhanzova chuan Pilgrimage Facilitation Centre hi tha taka sak zawh nise, mipuiin hmang tangkai se tih chu a duh ber a ni, tiin, helai ram Tourism department hminga landlease siam ngai pawh a rang lama tih chhuah turin hma an lak tur thu a sawi.
Inhmuhkhawmah hian Chite Veng khawtlang hruaitute bakah a kaihhnawih sawrkar department – GAD, Tourism, Horticulture leh Revenue hotute an tel a ni.
Aizawl East II bialtu MLA hian a bial chhung Chhinga Veng Bethany-a lei dawh mek pawh a enfiah a. Hmasawnna hna atan a thawhna tur sum awm ang angte tangkai taka hman a nih theih nan khawtlang hruaitute leh nodal department nen inpawhtlang taka sawi ho thin a pawimawh tih a sawi a ni.