Chona thar hmachhawn tura inpeih Rashford

Chona thar hmachhawn tura inpeih Rashford

Season kal meka khel tha lo leh manager thar Ruben Amorim hnuaia hmun pawimawh chang phak lo Marcus Rashford chuan club dang pan a, chona thar hmachhawn tura a inpeih thu a sawi.
United academy atanga inzirchhuak a, senior team-ah pawh vul zui ta Marcus Rashford hian season kal mekah beisei a phak loh vangin sawisel a hlawh hle. Erik ten Hag a chhuak a, manager thar Ruben Amorim an neih hnuin dinhmun chhe zawkah a ding zui leh bawk. Pathianni zan Manchester derby-ah Manchester City an hneh tum khan Rashford hian squad-ah hmun a chang phak lo hial a ni. Manager Amorim ruahmannaah hmun pawimawh a chan tawh loh vangin United chuan an forward hi hralh turin an chhawpchhuak a, club thenkhatin an ngaihven nghal. French champion Paris St-Germain chu Rashford ngaihventu langsar ber an ni a. Saudi Pro League club te pawhin kum 27 mi Rashford hi hlawh tam zet mai pek an inhuam reng bawk. A chawrchhuahna club ah hmun pawimawh a chan phak tak loh vangin Rashford ngei pawhin Old Trafford chhuahsan a, chona thar hmachhawn a duh thu a sawi chhuak ta hial a. January thlaah a chhuah ngei a rinawm.
United academy atanga inzir chhuak Rashford hian kum 2016 atang khan United senior team tan a khel tan a, inelna hrang hrangah vawi 426 khelin, goal 138 a thun tawh. 2022-23 season kha a chet that ber tum niin inelna hrang hrangah goal 30 lai a thun. Rashford hian England tan vawi 60 khelin goal 17 a thun tawh bawk.