Churachandpur boruak a la tang chhunzawm
Manipur-a curfew puanna, Churachandpur district chu Ninganiah pawh boruak a la tang hle a. Ni hnih liam taa Hmar leh Zomi hnam inkara buaina chhuak, mi pakhat thia mi eng emaw zat hliam tawrhna thlengin boruak a la chiah hle niin police-in an sawi.
Sikul leh dawr an la inkhal a, kohhran hruaitu leh vantlang pawlten muanna a awm theih nan an bei mek zel niin thuneituten PTI an hrilh.
Venhim hna thawktuten tharum thawhna thleng leh thei vengin Nilaini zan khan flag march an nei bawk.
Thawhlehni zana buaina chhuakah khan Hmar mi pakhat, kum 51 mi, Lalropui Pakhuangte chu thah a ni a. Silaia kah niin Sielmat Christian Hospital-ah hruai nghal ni mah se a thi zui a ni.
Hnam hnih inkara buaina hi Zomi-ten Pathiannia Hmar Inpui General Secretary Richard Hmar an beih atanga intan niin tharum thawhna a thleng zui a, Thawhtanni khan curfew puan nghal a ni.
Hetih lai hian relief camp-a la awm mek Kuki-te chu hmun him dangah sawn an ni.
Churachandpur hi Zomi tamna niin hmun tam vak lovah Hmar leh Kuki an awm bawk.
Nilaini atang khan zirlai pawlin Churachandpur district-ah hian inkhar an kalpui thar ve bawk a, hetih lai hian MLA leh tribal pawl hrang hrang hruaitute chuan muanna a thlen theih nan hma an la hlawm.
Churachandpur district-a Kuki-Zomi leh Hmar pawl 12-te chuan thuchhuah intawm siamin hnam leh hnam inkara muanna a awm theih nana hma la turin mipui an ngen a, nakin zela hetiang buaina hi a awm tawh lohna turin joint peace committee din tha an ti bawk tih an tar lang.
Churachandpur leh Pherzawl district-a MLA parukte pawhin a huhovin muanna leh inngeihna a awmtir turin mipui an ngen a, thuneitute pawh dan leh thupek kenkawh mumal a nih theih nan hma la turin an ngen bawk.
Churachandpur boruak a la tang chhunzawm
Get real time updates directly on you device, subscribe now.