Nagpur buainaa mawhphurtu chhui chhuak dawn

On Mar 21, 2025 40 0

Nagpur buainaa mawhphurtu chhui chhuak dawn
Maharashtra Chief Minister Devendra Fadnavis chuan Nagpur-a tharum thawhna thlenga mi beitute chu ‘an thlan atang pawhin hai chhuah an ni ang’ tiin Nilaini khan a sawi.
Fadnavis-a hian tharum thawhna thlen laia hmeichhe police constable laka lungawi lote mawi lo taka chea a kawr pawh thlaksak tumna hial a thleng nia sawi avanga thinrimna a awm mek laiin Maharashtra legislative assembly-ah buaina chungchang hi a sawi.
Chief minister mipui pungkhawm hian lung leh petrol bomb an hmang a, DCP rank officer pathum telin police 33-in hliam an tawrh thu a sawi a. “Nagpur-a thil thlenga police beitute kha an thlan atangin kan hnuk chhuak dawn. Police beih hi ngaihdam theih loh a ni. Hremna na thei ang ber an hmu ang, kan zuah dawn lo,” tiin a enkawl home department budget sawihonaah a sawi tih PTI-in a tar lang.
Nagpur khawpui mi, Fadnavis-a hian an khua chu tunah chuan a boruak a dai tawh tih a sawi bawk.
“Nagpur hi muanawm leh inngeihna hmun nia hriat a ni a. Kum 1992 hnu lamah lungawi lohnaa buaina ang hi a thleng tawh ngai lo. He tharum thawhna hi tute emaw ruahman lawk a ni a. VHP-in duh lohna an lantir laiin Aurangzeb-a thlen lem chauh hal a ni a, ayat (Quran-a chang) hal a awm lo; mahse, mak takin titi a darh a ni,” a ti.
Hetih lai hian Nagpur Police chuan Thawhtanni zana Nagpur lailia tharum thawhna thlenga a mawhphurtu ber nia an hriat, Minorities Democratic Party (MDP) hruaitu, Fahim Shamim Khan chu an man tawh.
Khan-a hi Ganeshpeth Police Station-a FIR ziah luhah a hming a chuang tel a. Phek 18-a chhah FIR-ah hian a bultumtu ber zinga tel anga tar lan a ni.
Police hian Khan-a hriam leh na taka thu a sawina video an tichhuak bawk.
“Police chuan Nagpur tharum thawhna kaihhnawihah mi 54 an man tawh,” tiin Maharashtra Minister of State for Home Yogesh Kadam chuan a sawi a, police beihna chu na taka kalpui a ni dawn tih a sawi ve bawk.
Tharum thawhna thleng chungchangah hian RSS thupuangtu, Sunil Ambekar chuan eng tharum thawhna pawh vantlang nunhona atan a that loh thu a sawi.
“Tharum thawhna hi chu eng chi pawh ni se khawtlang hriselna atan a tha lo va, police pawhin tha taka bawhzuiin a kimchangin an puang turah ka ngai,” a ti.
Tar an tawh angin Thawhtanni khan Hindu pawl, Vishwa Hindu Parishad (VHP) leh Bajrang Dal chuan kum 300 chuang liam taa thi tawh, Mughal emperor Aurangzeb-a thlan tihbo phutna an lantir a, hetah hian tharum thawhna nasa tak a chhuak zui a ni.