CIA-in lab atanga Covid darh ni theiah ngai

CIA-in lab atanga Covid darh ni theiah ngai
CIA chuan Inrinni khan Covid darh dan an chhuina thar an tihchhuahah coronavirus chu ramsa atang ai mahin Chinese lab atanga darh tan ‘a nih theihna a lian zawk’ tih an tar lang.
Intelligence agency hian he thil hi ‘a ni ngei e’ ti turin finfiahna tha tawk a la awm bik chuang lo tih an sawi.
An thutlukna siam hi Donald Trump-a’n CIA director atana a ruat thar, Ningani atanga a hna zawm chiah, John Ratcliffe-a’n a puang a ni.
President Trump-a hun hmasaa national intelligence-a director lo ni tawh, lab leak theory pawmtu ni zawk bawk, Ratcliffe-a hian Covid chu Wuhan Institute of Virology atanga put chhuak palh a nih theihna a lian niin a sawi a ni.
He hmun hi he hri kai hmasa hmuh chhuahna hmun, Huanan bazar atanga minute 40 chhunga tlan thlen thlen lek a ni.
Breitbart News-in an kawmna chu Zirtawpni khan tihchhuah a ni a, Ratcliffe-a chuan CIA hian lai taka hri lo chhuahna an chhui chu tihtawpa ‘sir dang pawh en’ an tum niin as awi.
“A hmaa ka lo sawi fo tawh thin zingah China atangin thil chi hrang hrang a lo chhuak thei a, American maktaduai an thih chhan leh Central Intelligence Agency hi Covid intanna chhuinaah kum nga chhung a sira an lo thut mai mai chhan pawh hi eng nge ni thei ang?” a ti.
Thuneitu sang pakhat chuan US chanchinbumite hnenah an ngaihdan thar hi zir chianna thar behchhan a ni lem lo tih a sawi a, a hmaa Trump-a sorkar hun laia mi tho a ni tih a sawi a. He thil hi Biden-a hun tawp hma lawk khan thar thawh niin Trump-a’n Thawhtanni kal taa pisa a luah leh hma khan zawh fel niin a sawi.
Inrinnia rin dan tihchhuah thar leh hi a ni ngei tih fiahna tha tawk a la awm lo va, hei vang hian chhuitute pawhin hmabak leh tih tur an la nei niin a sawi.
Covid hripui kha tun thlengin eng atang taka darh nge tih hi fiahna tha tawk a la awm lo.
Thenkhat chuan khuarela lo awm tih ngaihdan an ni a, hei hi ramsa atanga mihringin a kai chhawna darh zui ta sawina a ni a, heng mite hi chuan scientist emaw, laboratory emaw inrawlhna neiah an ngai lo.
Lab leak hypothesis an tih hi scientist tam takin an hnial thin a, a finfiahna tha tawk hmuh a la ni lo bawk a. A lo chhuahna, China pawhin hei hi hnawlin Washington-in ‘politics khelh nan’ a tih ve mai mai zawk niin a sawi.
Lab atanga put chhuak tih hian intelligence agency-te pawh a tibuai nasa hle a. Kum 2023 pawh khan FBI Director Christopher Wray chuan Fox News hnenah an pawl chuan ‘hripui lo intanna kha lab-a thil thleng vang a ni thei’ niin an ngai tih a lo sawi ve tawh bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More