CLIMATE SMART, SUSTAINABLE FARMING – 4

RK Dawla
Mb 9366095658
1. Hun rei tawh tak atangin Mizote hi kan lo FARM tawh a, kan vision leh perspective chu hlawk tura tharchhuah kha a ni deuh ber a. Mahsela, hlawk tak tak tura thil pawimawhte (crucial components) erawh kan hmaih thelh nuai fo thin. Pi leh pu atangin slash & burn kan kalsan hlei thei lova. Chutiang bawkin, thlai kumhlun hmunah pawh planting & weeding bâk, vei tak tak kan nei mawh hle. Tlo tur te, sik leh sa lo inthlâk zel laka him tura kan chêt dawn chuan, zau zawk leh thui zawka kan chêt a ngai tih hi Luka ziak tluka thil chiang a ni tawh, kan tun lai khawvelah hian. Chutiang atân chuan, Pathianin khawvel a enkawl dan leh awmtir dan kan ngaihtuah thiam a tul hle. Tin, kan potential mila kan chêt thiam a tul fo bawk. A bikin mechanised theih loh farm phei chu, tha sên leh tharchhuah a inmil theih nân chêt kan thiam a tul êm êm. Kan enkawl hneh loh tur tih hriat reng reng, ram zau tak tak, kan hläi pawp pawp mai hi a veiawm êm êm a, hmunhma zim zawkah tihtakzeta insawrbing kan mamawh. Khawvel pum en pawhin, a ram zau apiang an hausa-in an changkang chuang rêng rêng lo. Chuvangin, renchem taka kan hmunhma enkawl a, a tha thei ang bera theihtawp chhuah hi Mizoram hian a mamawh a ni!
2. Mithiamten an sawi thin a – khua a lum telh telh a, thlai eichhetu rannung chi hrang hrang an puang zel a, tuihnâ a kang telh telh bawk. Chutih laiin, kan hmunhma tam berah chuan tui lâk emaw khawl (storage) aiin thlai phun luh kan hmasak tlangpui. Hei hi a dik lova, a letling a ni. Thlai kumhlun rêng rêng, thal tui hmu leh hmu lo chu pafa ang maiin an inthlau thuai thin. Chuvangin, huan kan siam dawnin tuihnâ remchàn leh chàn loh te, tui khawlna siam te kha hna hmasa tur a ni. Ramhnuai thlai indawt chhâwng (multi-storey vegetative cover) kha thiatin, thlai chi 2/1 chauh kan phun ta a. Nisa leh ruahsur laka leilung venghimtu thilto buk leh hnah tlate awm ta lo chu, leilung a da telh telh a, chu chu natna leh eichhetu rannung hmangin thlaiah a lo lang chhuak a. Chu harsatna chu a chhan bulpui zawng lovin, a lerah tihdam kan tum ta a, India hmarchhak kila ram awih pangperah chuan, duh duh hmanrua hmuh tur awm lo leh hman hleih theih loh nen, buai namen lovin kan buai chho ta thin. Leiin a mamawh khawp hnâwng a hmuh loh chuan, thlasikah a sâwng a, a khi phuk phuk a, a khi kar a khal-châr a, lei tinungtu hrik tangkaite an che hlei thei lo fo thin. Lei sâwng chuan tui a nêk chhuak a, leia hnawng awm tha lovah chuan thlaiten chaw an ei hlei thei ta lo a ni. Hei vang hian Avocado, Zawngtah etc lêr emaw zar a thi ro a, keini lah chuan kan duh duh puh tur kan zawng a!
3. Kan ram hi Pathianin, tha zet, derdêp zetin a siam a. Chu chu dimdawi taka enkawl kan thiam a ngai. Ramdang thlai kan lâkluhte pawh kan enkawl thiam loh ang ai chuan, an thang duh tlangpui zel. An tlo lo tlangpui thung. Kan tlangte a hriam êm êm a, lui kam phai zau tak kan nei lo bawk. Kawrchhia kan ngah a, a ram pum ang chuan tlang pêr hlai pui hmuh tur a tlêm êm êm. Hei vang hian, kan sik leh sa baw-raw ve thin tak hian pawi a khawih nasa êm êm thin. A hnam anga kan thlir thui lohzia chu Aizawl khawpui atang hian a chiang âwm e. Aizawl chu Mizoram khawpui ber a ni a, lehkhathiam ber ber, a fing ber berte awm khawmna ni âwm tak a ni a. Mahsela, Aizawl khawpui building sak tawh leh sak mêk dan ngaihtuah hi chuan, furpui tuar ve ngai lo thâwkin kan thaw ni berin a lang. Kan sa huai êm êm a, leimin thlentu ber tuihawk kalkawng lah chu kan nei ropui lo êm êm. Chutih a hnêkin leimin siamtu, khawmual leh luia hnawksak ber mai plastic bawlhlawh ngaihsam takin kan thehthang satliah mai mai a! Aizawl khawpui building tam zawk ngial hi chu, thingtlang thlawhhma ang chauh a ni – engemaw chhung atân chauh a mawi, a sustainable lo! Seismic zone 6-ah kan awm tawh hnu pawha kan la harh hlei thei lo a nih chuan, kan dinhmun hi derthawng ru deuh a ni!