CID Tlang leh Kolasib-a thil thleng eptu party-ten an fuihpawrh vang ani – ZPM Thalai

CID Tlang leh Kolasib-a thil thleng
eptu party-ten an fuihpawrh vang ani
– ZPM Thalai
Thawhtannia CID Tlang-a thil thleng leh Kolasib-a thil thleng chu eptu party-ten an mi leh sate an fuihpawrh vanga thleng nia an ngaih thu ZPM Thalai chuan an sawi.
ZPM Thalai Hqrs. thuchhuak chuan, Mizorama sawrkar department-ten an ram an chan nasa tawh a, a bulpui berah chuan sawrkar siam tawh party pahnihten vote zawnna atan leh politics khelhna atan department ram an lo phalrai thin a, sawrkar department-ten department ram humhalhtu Committee an din a ngaih phah hial tih a sawi.
Heng Committee hian an department ram hi humhalh thin mah se, politics leh khawtlang a inrawlh tawh chuan a dingchang lo zawkah an tang ta thin a, hei hian sawrkar hnathawkte rilru pawh a hliam thin tih a sawi bawk.
2023 MLA inthlan dawnah Aizawl West-III MNF candidate chuan Bungkawn Venga Home department ram CID Complex chu khawtlanga pek a lo tiam avangin tunhnaiah mi thenkhatin CID Complex chu Bungkawn Veng tana pe turin dilna an siam a. February 16 khan punkhawm an huaihawt tih a sawi.
February 16 vek khan Kolasib leh a chhehvel kawngpui bituminous concrete-a chhunmam mai theih tura siam mek chu, eptu party hruaitute fuihpawrh theih thalai thenkhatin kawng zawhin kawng siam hna thawk mektute tan harsatna siam zawngin hma an la bawk tih a sawi.
‘Heng thilah hian a meizang hlaptu ber leh a kaihruaitute hi oppposition party mi an ni tih report kan dawng a. Sawrkarin theihtawp chhuaha hmasawnna tura hna a thawh mek tithuanawp zawnga thalai rilru thianghlim hruaikawitu opposition party-te hi kan dem takzet a ni,’ a ti.
Political party-ten sawrkar department ram tawktarh zawng leh hmasawnna hnathawh mek tithuanawp zawnga khawtlang mipui rilru hruaikawi tawh lo turin ZPM Thalai chuan a ngen, tiin, sawrkar ram pawh mipui ta tho a ni a, mahni ta a nih anga sawrkar ram humhalh kawngah sawrkar pui zawk turin mipui an sawm tih a sawi bawk.