Cincinnati khaw lum tuar loa chau Rinderknech

Cincinnati khaw lum tuar loa chau Rinderknech
Tunlai hi khaw lumin America a tuam mek a, Cincinnati Open khelhna hmun Ohio state-a Cincinnati khaw Lindner Family Tennis Center boruak pawh a uap lum pik churh a, Thawhtanni third-round match pakhatah Arthur Rinderknech chu court chhungah chauin a tlu zawi der a, vur funa deh harh a ngai hial!
French player Rinderknech hi first set-ah 7-6 (7-4)-in a tlawm a, set hnihnaah 2-2 a nih laiin baseline hnaihah boruak lum lutuk tuar loin a tlu a; khelmual chhunga damdawi thiam tlanluh hmain a tumpui Felix Auger-Aliassime leh umpire chuan an va pan bawisawm a.
Darkar hnih dawn an inkhelh hnua 30C zo loa chau kum 30 mi Rinderknech hi a nghawng leh ke lamte vurin an dep a, ngai a awh deuh hnuah match chhunzawm lehin, game hnih chu a han khel leh a, mahse, a tawp thleng zo loin a bang zui ta nge nge a, hahdam zawkin Canadian player Auger-Aliassime chuan last 16 a lut.
Pathianni second-round match pakhata veteran Roberto Bautista Agut a hneh loh tumin British number two Cameron Norrie pawh khaw lum avangin a talbuai hman tep a ni.
Kumin June thla mai khan Wimbledon lamah pawh he tournament khelh tawha a bul tan ni lum ber tum a thleng a, opening day lum zawng (temperature) khan 32.3C a thleng hial a ni!
Carlos Alcaraz-a’n five-set first-round match-a Fabio Fognini a hnehna inkhel kha deciding set-ah minute 15 lai an chawl a; ni sensa hnuaia inkhel entute zinga pakhat pawh a dam lo zui hial a ni.
January thla Australian Open phei kha chu a lum vet vet hle a, temperature khan 34C a kawk pha hial a ni!
Organiser-te chuan kum 2019 daih tawh khan Melbourne tournament khelh laia boruak endikna Australian Open Heat Stress Scale an ti chu an lo tichhuak tawh a, he tehna hmang hian court chhung boruak leh player-te hriselna an an vil thin a ni.