Cincinnati Open khel lo tur Djokovic

Naktuk, Ningani atanga khelh tan tawh tur US Open inbuatsaihna tournament hnukhawi lam Cincinnati Open-ah nikum ang bawkin 24-time Grand Slam champion Novak Djokovic a inhnukdawk leh ta!
Tournament buatsaihtute’n thuchhuah an siamah kum 38-a upa Swerb inhnuhdawh chhan hi hriselna lam kaihhnawih ni lo (non-medical) tiin an tarlang a, a chhan dik tak an sawilang tel lo thung.
Toronto khawpuia Canadian Open a khelh loh chhan hi chu thal bawr na vang a ni a; US Open warm-up tournament danga a inhnuhdawh leh tak zel avangin August ni 24 atanga khelh tan tur US Open hma chuan inelna a hmachhawn dawn ta lo niin a lang a, tennis player piang chhuak tawh zawng zawng zinga major title 25 la tling thei awmchhun nih a tumna kawngah New York khawpuiah pawh hian eng ruai a ang leh dawn lo ang em tih zawhna a piang a, Flushing Mewadows-a a tlak rual hian tennis a chawlhsan ve rup lo ang tih pawh sawi ngam a har!
Novak Djokovic hian kumin Wimbledon semi-final match-a Jannik Sinner a hneh loh hnu khan eng tournament mah a la hmachhawn leh ta lo a, Cincinnati Open-ah kum zawnin a inhnukdawk zui leh ta hian a chawlh hun hnaih chhoh zel dan a tarlang a ni mai em?
Grand Slam 24 la tling thei awmchhun pahnih zinga pakhat zawk Djokovic hian hian amaha record ropui pumbilh a tum mekna kawngah record ropui bik mahnia pumbilh zo bik lo chunga chawl ta Serena Williams hnung a zui ve mai dawn nia ngaihna a piang chho tan mek a, French Open leh Wimbledon-ah a hun tha neih bawhpelhin semi-final a paltlang zo lo ve ve a, kha mi match hniha a ngam loh kha world number one Jannik Sinner ve ve a ni.
Tarlan tak angin, nikumah defending champion ni chungin Cincinnati-ah Djokovic a lo inhnukdawk tawh a, September ni 7 thleng awh tur New York City-a grand slam tournament hnuhnungber US Open-ah hi chuan chhuak ngei turah ngai chhin phawt ang.