City an chak zo lo, Arsenal an chak

Thawhleh zana champions league khelhah si thum faia hmahruai hmasa zet chungin Manchester City an chak zo lo. Mak tak maia City an chak zawh loh lai hian Arsenal chuan Mimualah inkhel an hmachhawn chungin 5-1 ngawtin an chak thung.
Inelna hrang hrangah vawi nga ngawt tlawm zawn tawh Manchester City hian Etihad Stadium-ah Feyenoord Rotterdam an mikhual a, an mualah hnehna chang thei ngei tura ngaih a ni. Dutch club lian lakah bul an tan tha viau a, minute 53 chhungin goal thum ngawt an thun hman. 3-0 in hmahruai reng mah se hun tawp dawn hnaih lam minute 15 chhung lekin goal thum an chhuah zawn ve thung a, an tlarhnung pherh vangin hnehna an chang zo leh ta chuang lo.
Chak tum urhsun hian an mualah khel tha viau mah se goal erawh an thun thei lawk bik lo. Goal lut a awm theih loh reng hnuin City hi an vannei a, penalty an hlawhchhuak ta hlauh. Penalty hi Erling Haaland chuan minute 44-naah a pet goal a, hmahruaina goal a thun. Haaland goal thun hmangin City hian si khat faia hmahruai chungin chawlhlawk an hmang.
Chawlhlawk hnu lamah City in bul an tan tha leh zual a, goal pawh an thun belh thuai. Minute 50-naah Ilkay Gündogan chuan an goal hnihna a thun a, an hmahruaina a tizau. Gundogan goal thun atanga minute thum hnu lekah Erling Haaland chuan City goal thumna a thun tui leh zat. Team lian zawk ni chunga an muala inlan City in 3-0 ngawta hma an hruai vangin chak tur zawk a chiang thawkhat viau tawha ngaih a ni a, Feyenoord tan point hmuh ngaihna awm tawh lo ang hiala ngaih a ni. Mah se, game chu game ngang a ni a, hun a la tawp miau loh vangin thil danglam a thleng tlat thung.
Si thum an phurh reng hnuin Feyenoord hi hun tawp dawn hnaih lamah ropui zetin an inlan. Anis Hadj Moussa chuan minute 74-naah goal thunin an si phurh a sut then. He goal hian mikhual team a fuih phur thawkhat viau naa goal thum thun tawh City tan manganna tham a la tling chuang lo thung. City in goal thun belh tuma tan an khawh laiin Feyenoord bawk an che fuh nawn leh a, Santiago Giménez chuan minute 82-naah goal thunin an si phur then zui leh. He goal zet hi chuan mikhual team a fuih phur tak zet tawh a, mualneitu City lam pawh a tichiai ta viau bawk.
Chak zo lo thei an nihzia hrechiangin City hian goal thun belh tumin thapui an thawhzui chiam naa awmzia a nei tawh lo. Goal thun belh a hnekin an hlauhthawn ang ngei ngeiin goal an chhuah belh leh ta zawk. Minute 89-naah Dávid Hancko chuan goal thunin an si phurh a sut ta nge nge. Hancko goal thun hnu hian goal dang a luh belh thei tawh lova, Feyenoord Rotterdam chuan si thum zet phur tawh chungin Manchester City laka an si phurh an sut zo vek a, tmak tak maiin tlawm an pumpelh zui ta a ni. City laka tlawm an pumpelh hi Feyenoord Rotterdam tan result mak leh ropui a ni a. City tan erawh chuan result chhia, result mualphothlak tak a ni ve thung.
Arsenal an chak awlsam
An mualah ngei Manchester City an chak zawh loh laiin Arsenal erawh chuan Mimualah 5-1 ngawtin Sportinf Lisbon an lo hneh ve thung.
Sporting hi 4-1 ngawta Manchester City lo sawp tawhtute kha an ni a, Arsenal tan pawh Estádio José Alvalade-a len luh a chakawm fahran lo. Ciry tlawm tawhna mualah tha zetin an khel a, awlsam takin hnehna an chang ta tlat thung. London club lian Arsenal tan hian Gabriel Martinelli chuan inkhel tan atanga minute 7-na lekah hmahruaina goal a thun nghal. Hma takah goal an thun vangin an phur a, an inringtawk zui viau bawk. Gunners tan hian chawlhlawk hmain Kai Havertz leh Gabriel Magalhães ten goal an thun belh zui leh a, 3-0 a hmaruai chungin chawlhlawk an hmang.
Chawlhlawk hnu lamah mualneitu Sporting in bul an tan tha a, goal an thun ta thuai. Second half tan atanga minute hnihna lekahGonçalo Inacio chuan goal thunin an si phurh a sut then. Goal an thun vangin phur thar hluai mah se an phur rei lova, goal an chhuah leh thuai. Arsenal tan hian Bukayo Saka chuan minute 65-naah goal thuin an hmahruaina a tizau a. Hun tawp dawn hnaih minute 82-naah Leandro Trossard chuan an goal ngana a thun zui leh bawk a, an lenluhna mualah 5-1 ngawtin an chak zui ta a ni.
An mikhual Arsenal ngam lova an tlawm hi season kal meka Sporting Lisbon tlawm vawi khatna a ni. An manager Ruben Amorim chuan Manchester United a pansan tawh a. Amorim chhuah hnua UCL an khelh hmasak berah chiang zetin an tlawm a ni a, an manager hlui Amorim an ngai hle ngei ang.