City in Arsenal an hnaih zel

December 2, Thawhlehni zan khan English Premier League 2025-26 khelh chhunzawm a ni a, goal 9 ngawt luhna inkhelah 5-4 a chakin Manchester City in hmahruaitu Arsenal an hnaih deuh deuh zel. Fulham an hneh tum hian goal thun thei bik Erling Haalad chuan EPL-a goal 100 thun tling rang ber record thar a siam.
Season kal mekah beisei anga an khelh that tluan theih loh vanga sawisel hlawh City an insiamtha a, EPL-ah vawi hnih chak zawnin hma lam an pan zel. Team lian City hi Fulham hmachhawn turah Craven Cottage -ah an leng lut. Mikhual an nihna mualah an khel tha viau a, chawlhlawk hmain goal thum ngawt an thun hman. Chawlhlawk hma leh chawlhlawk hnu lamah bul tan tha viau mah se chawlhlawk hnu lama an talbuai ve viau thung a, goal thum ngawt an chhuah. Fulham lakah goal li ngawt chhuah bawk mah se derthawng tak chungin hnehna an chang tho thung.
Mikhual an nihna hmunah City in bul an tan tha viau a, goal thun theihna remchang an nei nghal Haaland chuan hun tha nei bawk mah se goal post a pet per hlauh thung a, a hun tha neih hmasak a hlah. A hun tha neih hmasak hlah mah se Haaland a kimki rei lo. Jeremy Doku cross tha tak chu Haaland hian minute 17-na lekah chiang zetin a pet goal a, hmahruaina goal a thun. Fulham laka hmahruaina goal thuntu Erling Haaland hian EPL-ah goal 100 a thun tling chiah a, EPL-ah goal 100 thu tling rang ber niin Alan Shearer record a khum.
Haaland goal thun hnuin City an khel tha chhunzawm a, Fulham in an si phurh sut tumin thapui a lo thawh bawk nen inkhel a hmuhnawm zual hle. Beisei angin goal luh belh mai lo mah se City in goal an thun belh leh ta nge nge. Haaland ball pekfing tak atangin Tijjani Reijnders chuan minute 37-naah awlsam takin a pet goa a, an goal hnihna a thun. Si hnih faia hma an hruai hnuin City in corner an chhawr tangkai a, goal an thun belh leh. Corner atanga ball kal zel chu tunhnaia khel tha thar Phil Foden ke zawnah a tla. Foden hian box pawn atangin top corner-ah mawi zetin a pet goal a, minute 44-naah an goal thumna thunin, an hmahruaina a tizau.
Team lian lakah goal thum ngawt chhuah zawn mah se Fulham an zam mai lova, an buai hek lo. Chawlhlawk dawn hnaih minute 44+2 naah H. Wilson Harry Wilson cross tha tak chu Emile Smith Rowe chuan far post ah fuh zetin a tauh goal a, an si phurh a sut then. Goal an thun vangin phur viau mah se chawlhlawk hmain goal dang an thun belh thei tawh lo thung a, 3-1 a hnufual chungin chawlhlawk an hmang.
Chawlhlawk hnu lamah City an khel tha chhunzawm a, goal an thun belh leh thuai. Second half tan atanga minute thumna lekah Haaland chuan fing takin Foden tan a siamsak a, Foden hian near post-ah pet goal in an goal lina a lo thun a, an hmahruaina a tizau. Foden goal thun hnu lawk hian Fulham tlarhnungte ball inpek sual vangin City in goal thun theihna hun tha an hmu. Jeremy Doku chuan goal thun tumin a shot a, Fulham defnder Sander Berge chuan an lamah a dang pial lut a, minute 54-naah City goal ngana a thunsak. He goal hi Doku goal a pawm awm tak a nih laiin own-goal anga chhiar a ni ta tlat thung.
5-1 ngawta an hnufual vangin Fulham dinhmun a chhe tawh hle. Hun a la tam bawk si a, goal an chhuah belh nual a, chiang leh zual zawka an tlawm a rinawm hle. An dinhmun chhe viau mah se team huaisen an nihzia an lantir a, goal thum ngawt thun zawnin, City an chhaih buai hman hle.
Fulham tan hian Alex Iwobi chuan minute 57-naah box pawn atangin leihrulah tawih zetin a pet goal a, an si phurh a sut then. Iwobi goal thu hian Fulham a fuih phur hluai a, na zawkin an mikhualte an nawr zui theih phah. Iwobi goal thun hnu lawk hian City in hun tha an nei ve leh a, Haaland chuan goal post a tauh per dawp a, uiawm takin a hun tha neih a chhawr tangkai thei lo. An him hram hnuin Fulhamin City an nawr let a, City tlarhnung chet fuh tawk loh vangin Samuel Chukwueze chuan lei hrulah fuh zetin a pet goal a, minute 72-naah an goal thumna a thun.
Goal thum lai thun tawh Fulham hian hun tha an nei zui leh thuai a, an goal thumna thuntu Chukwueze chuan minute 78-naah an goal lina a thun zui leh zat. City laka point hlawhchhuak turin goal khat chiah an mamawh ta a, point hlawhchhuah ngei tumin tan an khawh nasa hle. Na taka an khingpuite an nawr chhawr tangkaiin goal thun theihna hun tha zet an nei zui leh. An si phurh an sut zo ngei dawn emaw an tih tawh laiin City tlarhnung ten goal line bul lawk atangin a petchhuak hman hram a, uiawm takin an si phurh an sut zo thei ta lova, City chuan harsa takin hnehna an chang ta hram a ni.
Fulham laka chak City hian hmahruaitu Arsenal an hnaih leh zual a, point hnih chiahin an thlau tawh.