City in Liverpool an lehthal

Pathianni zan khan English Premier League 2025-26 khelh chhunzawm a ni a, inkhel ngaihven hlawh takah Manchester City chuan Liverpool an lehthal a, hnehna pawimawh tak an chang. An mualah an tlawm vangin Liverpool in Arsenal tan hna tha an thawhsak thei lo. Inkhel dangah Crystal Palace in Brighton an hneh a, game 9 zet hnuah hnehna an chang ve leh ta nge nge.
Anfield-a buai ve lo City
Champion lai Liverpool hi season kal meka beisei phak lo, paruknaa awm mek an ni a, top 4 huang luah phak an tumnaah chak an mamawh hle. An mikhual Manchester City an hneh a nih chuan an chunga awm Chelsea an hnaih sauh dawn a, palinaa awm mek Manchester United nen an inkarah point hnih chauh a tla zep dawn bawk. Anfield a inlan tur an nih vangin Liverpool hin rin hlawh viau mah se Anfield-a buai ve mai mai ngai lo City lakah an ding nghet zo lova, lehthala awmin tlawm zawkah an tang.
Liverpool tantute thawm a that theih em vangin Anfield hi mikhual team tan hmun ralti, talbuai awl em emna hmun a ni a. Team lian ropui tak takte pawh talbuaiin tihmualpho an lo ni tawh thin. Hetihlai hian Manchester City tan erawh Anfield hi khelmual zuamawm, an chak theih riauna hmun a ni ve tlat thung. Anfield-ah hian Reds leh City hi vawi 91 an inkhelhna a ni a, City hian vawi 35 hnehna changin an chak tam zawk a. Vawi li ngawtin Liverpool ai hian an chak tam zawk. Heti a nih vang hian Anfield-a chak turin an inringtawk viau a. Arsenal nen an inkar tihzim nawn leh ngei tumin Anfield an pan.
Inrinni zanah Aesenal an chak vanga chak mamawh City in ngam takin mualneitu Liverpool an nawr a, hma takah goal an thun teuh hle. City hian mawi zeta Liverpool tlarhnung an thiah hnuin Erling Haaland chuan goal thun theihna hun tha a nei a. Reds si nghak Alisson Becker chuan rang zeta lo dangin an team a chhanhim. City tan hian Antoine Semenyo chuan goal thun theihna hun tha a hlah ve bawk.
Bet zawk leh derthawng zawk an nih hnuin Liverpool in goal thun tumin tan an khawh zui chiam a, Hugo Etikite chuan goal thun theihna hun tha nei bawk mah se uiawm takin a hlah a. Florian Wirtz shot tha tak pawh Liverpool in an lak theih tak loh Marc Guehi chuan tha zetin a lo dang hman hlauh bawk a, City an him nawn ve leh bawk.
Inkhel hmuhnawm takah goal lut a awm theih loh reng hnuin hun tawp dawn hnaih lamah goal a lut ta nge nge. Inkhel tihmuhnawm leh zual turin inkhel tawp dawn hnaih lamah goal thum ngawt a lut hial a, hei hian mit a titlai tak zet. Reds in free-kick an hmuh chu Dominik Szoboszlai chuan minute 74-naah turu zetin a chhuih goal a, goal ropui thunin hmahruaina goal a thun ta nge nge.
Liverpool lakah goal an chhuah vangin Manchester City dinhmun a chhe hman hle. Hnufual zawk an nih vangin City leh Arsenal inkar-ah point 9 lai a tlazep hman. Liverpool an lehthal thei lo a nih chuan Pep Guardiola team tan champion a harsa leh zual dawn a. Anfield-ah hnehna chan ngei tumin thih thah tak meuh meuhin tan an khawh a, an thawhrim leh an huaisen rah an seng a, goal hnih an thun ta hial a ni.
Goal thun ngei tuma tan khawh City hian hun remchang an hmu a, Bernardo Silva chu Reds defender karah dawkchhuak zawkin si nghak Alisson kapkarah rang zetin a pet lut a, min ute 84-naah goal thunin an si phurh a sut.
1-1 a nih hnuin inkhel a hmuhnawm zui viau a, goal thun tumin an innawr tawn nasa hle. Goal thum tumna an innawr viau laiin hun pek belhah Si nghak chetha Alisson a chesual a, tul lo takin penalty a chawi. He penalty hi Erling Haaland chuan goal kilah fuh zetin a chhuih goal a, minute 90+4-ah hma an hruai letna goal a thun.
An mualah ngei hnufual zawk an nih hnuin Liverpool in goal thun ngei an tum a, goal chhuah belh huamin an khingpuite an nawr. Goal thun an tum luat vangin si nghak Alisson pawh a tlanchhuak daih a, City goal bulah a tap chawt. Alisson tlanchhuak hi City in an chhawr tangkai a, goal an thun belh phah. City hian fuh zetin an khingpuite an nawr let thut a. Bernardo Silva chuan khelmual lai hawl vel atangin goal ruakah a pet goal. Ball um luttu Erling Haaland chu Dominik Szoboszlai lakah a fault nia ngaiin Liverpool in VAR rawn an phut. VAR rawn a nih hnuin Szoboszlai lakah a fault vangin hnawhchhuah a ni ta zawk. Szoboszlai hnawhchhuah a nih vangin City goal thun pawh hnawl a ni tel ve bawk a, free-kick pek an ni. Freekick an chhuih hnuin inkhel a tawp zui a, Manchester City chuan Anfield-ah ngei hnehna an chang zui ta a ni.
Liverpool an lehthal vangin City leh Arsenal inkar a zau belh lo va, point rukin a la daidan. Liverpool lehthaltu City hian champion tumin hma lam an pan zel a, nilai zana an mikhual tur Fulham an hneh a nih chuan Arsenal an hnaih sauh ang a. Brentford hmachhawn zui tur Arsenal lakah pressure tam zawk an siamsak ang. City in champion an beisei zui zel laiin Liverpool tan erawh champion beisei ngam a ni ta meuh lo va, champion lai Reds hian champions league khelh phak hram tumin tan an khawh zui hle tura ngaih a ni.
Palace an chak ve ta
Pathianni zana inkhel dangah tunhnaia chak harsat Crystal Palace chuan mikhual an nihna hmun American Express Stadium 1-0 in mualneitu Brighton & Hove Albion an hneh a, point thum an hmu ve leh ta nawlh.
Brighton laka Crystal Palace chakna goal hi minute 61-naa Ismaïla Sarr thun a ni a. Brighton in hun tawp thlengin an si phurh an sut thei lo a, Palace hnehna an chang ve ta nawlh. Crystal Palace in EPL-a hnehna an chan hnuhnung ber chu January ni 3-ah 2-0 Burnley an hneh kha a ni a. Hemi hnu hian an chak thei lo ngar ngar a. Game 9 chhung zet an chak theih loh hnuin an chak ve leh ta nawlh a. Brighton laka an chakna hi hma lam pan tura an insiamthat tanna leh lei rem an rah leh tanna a nih ngei a beiseiawm.