City in Marc Guehi an la lut

Manchester City chuan defender thar an nei a, England defender Marc Guehi chu Crystal Palace atangin an la lut fel.
EPL-ah pahnihna ni mek City hi hliamin a tibuai viau a, an defender pathum; Josko Gvardiol, Ruben Dias leh John Stones te an chhawr thei lo mek. Hliam vanga John Stones a chawlh reng hnuin Chelsea an hmachhawn tumin Gvardiol leh Ruben Dias te an inhliam thar ve leh bawk. Heti a nih vang hian tlarhnungah an buai thar hle a. An defender tha ten hliam an tawrh vangin Watford-ah loan-a an chhuahtir academy defender Max Alleyne pawh a kokir tawh hial a. An buai thar vang hian defender lak tumin hma an la nghal. City in lak an duh ber chu Crystal Palace leh England defender Marc Guehi a ni.
Marc Guehi hi season tawp ruala contract hmang zo mai tur a nih vangin club lian hrang hrangin an ngaihven hlawm. Free transfer-a lak tum zingah Liverpool, Bayern Munich, Real Madrid, Barcelona, Inter Milan leh Atletico Madrid te pawh an tel niin tarlan a ni. Liverpool hian nipui bazar liam taah khan an la lut teuh viau nghe nghe. An indawrna tlawlh ta mah se an ngaihven chhunzawm reng tho a. Lak luh duh viau mah se City an el phak ta lo a ni.
City hian Crystal Palace captain Marc Guehi manah £20m an seng a, kum nga daih contract an ziahpui. Mimal inremna an neihpui hnuin Pathianni khan medical test an neihpui a, thawhtanni khan an la lut zui ta a ni. Nipui bazar inhawn hunah a thlawna chhuak thei a nih vangin Palace tan pawh tunah £20m zeta hralh hi thil hlawkthlak ta a ni ve reng bawk.
City defender thar Guehi hi Chelsea academy chhuak a ni a, Chelsea senior team tan a khelh hmain Swansea ah loan in a khel a. Kum 2021 khan Crystal Palace a zawm zui leh. London club Palace tan hian inelna hrang hrangah vawi 188 lai a khel hman. England tan kum bithliah inelna hrang hranga a khelh hnuin kum 2022 atangin senior team tan a khel tan a, defender hmasawn ber pawl niin England tan hian vawi 26 khelin goal 1 a thun tawh. Club lian zawk City ta an a inlan dawn a, a hming a chhe len leh zual a beiseiawm.
EPL-ah pahnihna ni a, hmahruaitu Arsenal hnaih tak tak thei rih lo City hian thlasik bazar inhawng mekah player hrawl pahnih an la lut ta a. £62.5m senga an lak luh Antoine Semenyo an chhawr tangkai nghal viau a. Marc Guehi pawh hi chhawr tangkaiin an tlarhnung a phui phah sawt tura ngaih a ni.