City in Real Madrid an hneh

On Dec 12, 2025 4 0

Nilai zan khan English club lian Manchester City chu khawvela foptball club hausa leh hlawhtling ber Real Madrid hmachhawn turin Santiago Bernabeu-ah an leng lut. Tunhnaia hartharna chang City hia mikhual an nihna hmunah 2-1 in hnehna an chang a, point thum hlu tak an hmu. An mualah an tlawm leh tak vangin Real Madrid manager Xabi Alonso hma lam hun turah zawhna a tam leh zual hle.
Real Madrid hian an mikhual Manchester City hi an ngam viau a, inkhel tir lamah an nawr buai thei hle. Vinicius Junior chuan penalty hlawhchhuak ngeiah a inngai hman. VAR rawn a nih hnuin City an him hlauh a, penalty chawi lovin free-kick an chawi. Hemi hnu hian Vinicius Jr hian goal thun theihna hun tha a nei zui leh a, a hun tha neih chu uiawm takin a hlah. An hun tha neih hlah zawn mah se City an him reng thei lova, Real in goal an thun ta nge nge. Rodrygo chuan lei hrulah fuh zetin a thlawlh lut a, minute 28-naah hmahruaina goal a thun ta nge nge.
Hmahruaina goal an thun vangin lawm viau ma se Real Madrid an lawm rei lo. Si nghak Thibaut Coutois chet fuh loh vangin City in hun tha an nei a, Nico O’Reilly chuan minute 35-naah hnaite atanga pet goal in an si phurh a sut.
1-1 a nih hnuin inkhel a hmuhnawm zui viau a, City in goal thun ngei tumin tan an khawh. Chawlhlawk dawn hnaihah Real Madrid defender Antonio Rudiger chuan box chhungah Erling Haaland a pawttlu a, penalty a chawi. A hlawhchhuah penalty hi Haaland chuan harsatna goal lovin a pet goal a, minute 43-naah hma an hruai letna goal a thun.
Chawlhlawk hnu lamah inkhel a hmuhnawm viau a, goal thun tumin an innawr tawn nasa hle. Real Madrid in an si phurh sut ngei tumin tan khawh bawk mah se hun tawp thlengin goal an thun thei tawh lova, an mikhual City lakah uiawm taka tlawmin, an tualzawlah ngei an mualpho. Tunhnaiah an khelh that loh vangin Real Madrid manager Xabi Alonso duhkhawp lohna a lian thar hle a, a hma lam hun tur chiang lo leh zual anga sawi a ni.
Real Madrid hnehtu City hian khelh 6 atanga point 13 hmuin palina an luah a, Real hi pa 7-naah an awm ve mek thung.