City in West Ham an lehthal

Inrinni zana English Premier League khelhah champion lai Manchester City chuan West Ham United leh lakah si an phurh hmasak zet hnuin, 3-1 in an hnehna an chang let a. EPL club zingah season thara chak vek awmchhun niin hma an hruai zui zel.
London Stadium-ah season tharah che tha pahnih, tlawm nei lova kal tluang ve ve West Ham leh Manchester City an inhmachhawn a. Season thara bul tan tha West Ham in champion lai lakah bul tan tha in, goal an thun hmasa a. An mualah point hlawhchhuah tumin thapui an thawh. An goal venhim tum viau mah se City er let an tuar lova, season thara a vawi khat nan an mualah ngei tihtlawmin an awm.
London Stadium-a inkhel hmuhnawm takah hian Southampton atanga an lak midfielder James Ward-Prowse chuan Coufal siam tha tak chu hnaite atangin a tauh goal a, minute 36-naah hmahruaina goal a thun. City in an si phurh sut tumin tan khawh viau mah se goal an thun thei mai lova, si khat faia hnufual chungin chawlhlawk an hmang phawt.
Champion lai City in chawlhlawk an hmang tangkai a, chawlhlawk hnu lamah hmuhnawm taka inlanin, goal thum an thun. Second half tan atanga munute khat hnu lekah Jérémy Doku chuan vei lam si atangin tawih zetin a pet goal a, an si phurh a sut. Goal khat ve ve an thun hnuin inkhel a hmuhnawm sauh a, City an hmuhnawm leh zual. Na taka an khingpui nawrtu City hian goal an thun zui leh. Box pawn atanga Jullian Alvarez ball pek fing leh fuh tak chu Bernardo Silva chuan awlsam takin a pet goal a, minute 76-naah hma an hruai letna goal a thun.
Hma an hruai let hnuain champion lai City hi inrin-tawkna sang zawk nen an inlan zui a, an khingpuite an chhaih buai viau thin. An forward pawimawh Erling Haaland chua goal thun theihna hun tha nei fo mah se goal a thun hlei thei lo. Hun tawp dawn hnaih minute 86-naah erawh Haaland hian goal a thun ta nge nge a. Lei hrulah kawh zeta pet goal in, an goal thumna a thun. Haaland goal thun hnu hian goal dang luh belh lovin inkhel a tawp a, 3-1 a chak City in point thum an hmu.
West Ham United an hneh leh tak vangin Manchester City hi season tharah match ngaah an chak fai vek a, point 15 hmuin hma an hruai zui zel. City hi an hnuaia awm Liverpool leh Tottenham lakah point hnihin an sang fal mek. City lakah an tlawm vangin Hammers hi season thara a vawi khat nan an tlawm a, khelh nga atanga point 10 hmuin, paruknaah an tlahniam ve thung.
Champion lai City hian season tharah bul an tan tha viau a, an champion zui leh thei a nih chuan ngawi nga champion zawn hmasa ber an ni ang.