City leh Arsenal an chak nghal

Football a tualchhung club te inelna zinga ngaihhlut hlawh leh sum tamna ber English Premier League chu August 11, Zirtawpni zan khan khelh tan a ni ta a. EPL 2023-24 season a inkhel hmasa berah champion lai Manchester City in tha takin bul an tan a, Championship atanga kaisang Burnley chu si thum faiin an hneh nghal. Inrinni zana inkhelah Arsenal leh Newcastle United ten hnehna an chang ve leh bawk.
City 3-0 Burnley
Burnley mual Turf Moor-a lenglut City hian an captain hlui Vincent Kompany enkawl Burnley lakah bul an tan tha viau a, inkhel tan atanga minute lina lekah Erling Braut Haaland chuan hmahruaina goal a thun nghal. EPL-ah season khat chhunga goal thun hnem ber record siamtu Haaland hian minute 36-naah an goal hnihna a thun zui leh a. An goal thumna hi minute 75-naah tunlaia holding midfielder tha ber ang hiala ngaih Rodri thun a ni.
Manchester City hi EPL 2023-24 ah pawh champion leh tura rinkai ber an ni a. EPL-ah an champion nawn leh thei a nih chuan EPL chanchinah vawi li champion zawn thei hmasa ber an ni ang a, record thar an siam ang. EPL 2023-24 season-a champion tur inrinsiaknaah City hian rin an hlawh viau a, Goal.com leh BBC Sport in champion tura an rin ber an ni ve ve. Player an nei tha a, manager an nei tha bawk nen Pep Guardiola enkawl City hian champion leh turin rin an kai hle.
Player nei thain, an player te inman viau tawh mah se City manager Pep Guardiola chuan season hmasa ang em em chuan an ropui nawn leh theih a ring lova. Trophy lian pathum lak a, treble champion nih phei chu thil theih loh tawp ni hiala a ngaih thu a sawi.
City lakah si thum faia tlawm Burnley hi season liam taah khan Championship-a champion ni a, EPL-a kaisang an ni a. An manager hi City defender ropui Vincent Kompany a ni nghe nghe.
Burnley lakah Manchester City a chakpui vangin manager Pep Guardiola chu EPL-a team enkawl vawi 200 chakpui thei pathumna nih a hnaih zual sauh a, EPL-ah vawi 200 hnehna chang turin vawi hnih chak chiah a mamawh tawh. Team enkawl vawi 200 chakpui thei pahnih Manager ropui Sir Alex Ferguson leh Arsene Wenger te hnung a zui ang thei teuh tawh hle. EPL-a manager ropui ber ang hiala ngaih Sir Alex Ferguson khan Manchester United kha EPL-ah vawi 528 zet a chakpui a. Arsenal manager ropui Arsene Wenger khan Gunners hi vawi 476 zet a chakpui ve tawh bawk.
Arsenal 2-1 Nottingham Forrest
Team hmuhnawm, season thara an chetla hmuh chakawm tak Arsenal chuan inrinni zan tir khan Emirates Stadium-ah Nottingham Forrest an mikhual a, chawlhlawk hmaa goal hnih an thun chakpuiin, point thum an hmu.
Arsenal hi an mualah an khel tha viau a, kawng hrang hrangin an khingpuite an thunun. Na taka an mikhualte nawrin, minute 26-naah hmahruaina goal an thun. Minute 26-naah hian Martinelli siamsak chu Edward Nketiah chuan box chhungah fuh taka a khalh kual hnuin tawih zetin a pet goal a, hmahruaina goal a thun. Hmahruaina goal an thun hnuin an khingpuite an nawr na leh zual a, goal an thun belh leh thuai. Minute 32-naah defender Wiliam Saliba hnen atanga ball a hmuh chu Bukayo Saka chuan box pawnah a khalh rem a, goal kilah mawi taka pet goal in an goal hnihna a thun a. Si hnih faia hmahruai chungin chawlhlawk an hmang.
Chawlhlawk hnu lamah Arsenal an khel tha chhun-zawm a, goal thun theihna hun nei belh bawk mah se, goal an thun belh thei lo. Hun tawp dawn hnaih minute 82-naah mikhual team Notting-ham Forrest tan Taiwo Awoniyi chuan goal thunin an si phurh a sut then. Goal dang thun belh tum viau mah se, hun tawp thlengin goal dang a luh belh thei lo va, Arsenal chuan an mualah 2-1 in hnehna an chang zui ta a ni.
Newcastle United 5-1 Aston Villa
Season liam taah rin phak baka chetha a, champions league khel tura inhlangkai ta hial Newcastle United chuan season thara an match hmasa berah tha takin bul an tan a, St James Park-a an mikhual Aston Villa chu 5-1 ngawtin an sawp nghal. Villa an sawp tum hian an player thar Sandro Tonali chuan goal a thun nghal a. A club thar tan tha takin bul a tan.
St James Park-a inkhelah hian minute rukna lekah Sandro Tonali chuan hmahruaina goal a thun. Hma taka goal an thun vangin phur viau mah se goal an chhuah ve ta thuai thung. Minute 11-na lekah Moussa Diaby chuan a club thar Aston Villa tan goal thunin an si phurh a sut. Hma taka goal hnih a luh vangin inkhel a hmuhnawm zui viau a, minute 16-naah Alexander Isak chuan Newcastle hmahruai nawn lehna goal a thun a, 2-1 a hmahruai chungin chawlhlawk an hmang.
Chawlhlawk hnu lamah Magpies an khel tha chhunzawm a, goal thum an thun belh leh. Minute 58-naah Alexander Isak chuan chuan an goal thumna a thun a, minute 77-naa Callum Wilson goal thun bakah minute 90+1-ah Harvey Barnes chuan an goal ngana a thun zui leh a. 5-1 laia hnehna changin tha takin season thar bul an tan.
Result dang ; EPL 2023-24 khelh tan takah championship atanga kaisang pathum; Burnley, Sheffield United leh Luton Town te tlawm zawkah an tang vek. Burnley hian champion lai Manchester City an hneh lova, Sheffield United chu Bramall Lane-a an mikhual Crystal Palace lakah 1-0 a an tlawm laiin Luton Town chuan 4-1 in Brighton an hneh lo ve bawk. Season thara an khelh hmasak berah Everton chu Goodison Park-a an mikhual Fulham hneh lovin an tlawm ve bawk.