City leh Arsenal inkar a zim

Nilai zan khan English Premier League (EPL) 2025-26 khelh chhunzawm a ni a. Manchester City chuan an mikhual Fulham lakah awlsam takin hnehna an chang a, hmahruaitu Arsenal nen an inkar an tizim. Manchester City rual hian Aston Villa pawhin hnehna an chang a, champion an beiseina chawh nun tharin a awm ve bawk.
City 3-0 Fulham
Table-ah pahnihna luah mektu Manchester City hi hmahruaitu Arsenal nen an inkar tizim a, champion beiseina sang zawk nei zui thei turin an mualah chak a pawimawhzia an hrechiang a. An mikhual Fulham hneh ngei tumin thapui an thawh. An mikhualte hi an ngam viau a, chawlhlawk hmaa goal thum an thun hmangin hnehna pawimawh tak an chang.
City hian an mualah bul an tan tha viau a, inkhel an mikhualte nawr tlangin Phil Foden chuan goal thun theihna hun tha nei mah se si nghak Berd Leno a paltlang zo lo. City hian na takin an khingpuite an nawr a, Reuben Neves-an goal a thun teuh leh viau bawk. An hun tha an hlah zawn hnuin goal an thawkchhuak ta nge nge. Erling Haaland tauh remsa chu Antoine Semenyo chuan hnaite atangin a pet goal a, minute 24-naah hmahruaina goal a thun.
Goal an thun vangin City an phur viau a, an mikhualte an nawr na chhunzawm zel. Goal thun belh an tum luatah a chesual a, goal an chhuah teuh hle. Fulham in City an nawr let thut a, goal thun theihna hun tha tak an nei. Si nghak Donarrumna chuan tha taka dangin Fulham hun tha neih a tihthlawnsak a, an team a chhanhim. Goal an chhuah teuh viau hnuin City in fuh taka an khingpuite an nawr tlangin Nico O’Reilly chuan minute 30-naah fing leh fuh takin a pet goal a, an goal hnihna a thun.
Nico O’Reilly goal thun hnuin City an khel tha chhunzawm a, goal an thun belh leh thuai. Erling Haaland chuan goal thun thei bik a nihzia a lantir a, minute 39-naah box pawn atanga pet goal in an goal thumna a thun a, an hmahruaina a tizau leh zual.
Chawlhlawk hnu lamah inkhel hmuhnawm chhunzawmin, goal thun theihna hun tha nei ve ve bawk mah se goal lut a awm belh thei tawh lo. Arsenal hnaih leh zual tura chak mamawh Manchester City chuan an mualah awlsam taka hnehna changin an mamawh point an hmu a, Arsenal an nawr tawm leh zual.
Fulham sawptu Manchester City hian khelh 26 atangin point 53 an hmu a, hmahruaitu Arsenal nen an inkar a zim leh zual a, point thum chauhin a daidan tawh. Arsenal hian ningani zan khan Brentford an hmachhawn a, Brentford lakah an tlawm a nih chuan point thum chauhin hma an hruai tawh dawn a, EPL-ah champion tuma inelna boruak a nung thar leh zual ang. City laka tlawm Fulham in khelh 26 atanga point 34 hmuin 12-na an luah ve thung.
Anton Villa an vannei
Table-ah pathumna luah a, champion theih beiseina sang zawk nei thar leh tura chak mamawh Aston Villa chuan Villa Park-ah Brighton & Hove Albion an mikhual a. An mikhual lakah vanneithlak ang reng takin an chak a, own-goal an chakpui. An mualah an chak vangin Villa hian hmahruaitu Arsenal an phak lohna chu point ruk chiah a ni tawh.
Anton Villa hian an mualah chak ngei tumin tan an khawh a, khelh pawh an khel tha viau. Goal thun theihna remchang nei bawk mah se club lian zawkte pawhin an hmuhtaih em em si nghak Bart Verbruggen chuan tha zetin a dang a, Villa hun tha neih a tihthlawnsak. Villa hian chawlhlawk hmain goal thunna hun remchang nei nawn leh mah se an chhawr tangkai thei chuang lo.
Chwlhlawk hnu lamah Brighton hlauhawm hmasa mah se goal bar an pet per a, goal an thun thei bik lo. Goal lut a awm theih loh reng hnuin Jack Hinshelwood chuan an lamah a ti-goal a, he goal hi Villa in an chakpui zui ta a ni.