City leh Aston Villa an tlang ve leh

Pathianni zan khan FA Cup quarter-final khelh zawh a ni a, Manchester City leh Aston Villa ten hnehna changin semi-final an lut ve leh.
City in Bournemouth an lehthal
FA Cup quarter-final lut zinga team lian leh hausa ber an nih vanga champion tura rinkai ber Manchester City in AFC Bournemouth lakah bul an tan tha lova, goal chhuah hmasa zawkah an tang. Vitality Stadium-a an mikhual City lakah Bournemouth hian bul an tan tha a, minute 21-naah Evanilson chuan hmahruaina goal a thun. City hian an si phurh sut tum viau mah se chawlhlawk hmain goal an thun thei lova, hnufual zawk ni chungin chawlhlawk an hmang.
Chawlhlawk hmain hmain goal thun thei lo mah se chawlhlawk hnu lamah City an khel tha lehzual a, second half-ah goal an thun thuai. Second half tan atanga minute lina lekah Erling Braut Haaland chuan goal thunin an si phurh a sut. An si phurh an sut hnuin Pep Guardiola naute inrintawkna sang zawk nen an inlan a, goal pawh an thun belh leh thuai. City tan hian Omar Marmoush chuan minute 63-naah hma an hruai letna goal a thun. Marmoush goal thun hnu hian goal dang a luh belh thei tawh lova, City chuan an mikhual AFC Bournemouth lehthalin semi-final an lut zui ta a ni.
EPL-a champion lai City hian season kal mekah beisei an phak lo hle. EPL-ah panganna ni mekin an champion zo tawh dawn lo ni ngeiin a lang a. Carabao Cup leh Champions League atangin an tla fel tawh bawk. FA Cup hi an tan champion theihna awmchhun a ni rih a. Kut benga season an khar loh nan FA Cup-ah champion ngei tumin an theihna zawng zawng an hlan ang.
AFC Bournemouth hnawtchhuaktu Manchester City hian semi-final-ah Nottingham Forrest an hmachhawn zui leh dawn. Nottingham Forrest hi season kal mekah beisei phak baka khel tha an ni a. EPL-ah pathumna ni mek an nih bawk vangin City tan zuam ngawt chi an ni dawn hauh lo.
Villa an chak nuamsa
Pathianni zana quarter-final dangah Aston Villa chuan mikhual an nihna hmunah si thum fai ngawtin Preston North End an sawp a, nuamsa taka hnehna changin semi-final an lut. Semi-final-ah Crystal Palace an hmachhawn zui leh dawn a, Manchester City an pumpelh vangin semi-final luh theih beiseina sang zawk an nei ngei ang.
Deepdale a lenglut Villa tan hian Marcus Rashford chuan minute 58-naah hmahruaina goal a thun a. United atanga an hawh mek Rashford hian minute 63-naah penalty atangin Villa goal hnihna a thun zui leh bawk. Manchester United manager Ruben Amorim-a’n a chhawr that duh loh vanga loan-a an chhuahtir Marcus Rashford hi Aston Villa atangin a vul nawn leh mek. Hun rei tak hnuah England tan a khel leh a, ram tan a inlan hnu lawk; FA Cup quarter-final-ah goal hnih a thun zui leh bawk. Villa goal thumna hi minute 71-naa Jacob Ramsey thun a ni.