City leh Liverpool an chak

City leh Liverpool an chak
Inrinni zan khan FA Cup fourth round khelh a ni a team lian Manchester City leh Liverpool ten hnehna an chang. City leh Reds an chak laiin EPL ah pathumna luah mektu Aston Villa an tla ve thung.
Guehi an goal a thun
Champion tura rinkai zinga mi Manchester City chuan Etihad Stadium ah Salford City an mikhual. An mikhualte hi khingpui hautak tura ngaih an nih lem loh vangin City hian chak turin rin an kai viau. Rin lawk ang ngeiin hnehna chang bawk mah se goal erawh an thun tam thei bik lo.
City hian an mualah bul an tan tha viau a, goal pawh an thawkchhuak thuai. Inkhel tan atanga minute 6-na lekah Salford player Alfie Dorrington chuan an lamah a ti goal a, City hmahruaina goal a thunsak.
Hma takah goal thun bawk mah se City in goal an thun belh thei mai bik lo. Na taka an khingpuite nawrin, hlauhawm siam thin mah se a hmawr an bawk fuh thei tlat lo thin a, an hmahruaina an ti zau mai thei bik lo. Beisei phak bakin khel tha bawk mah se Salford lam pawhin goal an thun thei bik lo. Hun rei tak chhung goal lut a awm belh theih loh hnuin thlasik bazar laia an lak luh Marc Guéhi chuan minute 81-naah an goal hnihna a thun a, an hmahruaina a tizau. Geuhi-an City tan a goal hmasa ber a thun hnuin goal dang a luh belh thei tawh. City hian an mualah 2-0 in hnehna an chang a, round sang zawk an inhlangkai.
Liverpool 3-0 Brighton
Season kal meka chak tluang hleithei lo Liverpool chuan Anfield ah Brighton & Hove Albion an mikhual. Reds hian an mualah 3-0 in hnehna an chang a, champion tumin hma lam an pan zel.
Liverpool hian an mualah bul tan tha thawkhat mah se EPL a an elpui Brighton lakah goal erawh an thub hma thei bik lo. Brighton pawhin hun tha nei bawk mah se an chhawr tangkai thei bik lo. Goal lut a awm theih lawk loh hnuin Curtis Jones chuan minute 42 naah goal a thun ta nge nge a, 1-0 a hmahruai chungin chawlhlawk an hmang.
Chawlhlawk hnu lamah Liverpool an khel tha chhunzawm a, goal hnih an thun belh leh. Khel tha tluang tak Dominik Szoboszlai chuan minute 56 naah an goal hnihna a thun a, an hmahruaina a tizau. Goal hnih an thun hnuin penalty an hlawhchhuak zui leh a, Mohamed Salah chuan minute 68 naah penalty pet goal in an goal thumna a thun a, an chakna a nem nghet.
Chelsea pawh an tlang
Manager thar Rosenior hnuaiah EPL a an tlawm hnuin Chelsea chu FA Cup ah an insiamtha zui nghal a, 4-0 a Hull City hnehin fifth round an inhlangkai
Chelsea tan hian Pedro Neto chuan minute 40’, 51’, leh 71-ah te goal thunin lungthu a kim a, Estavo chuan goal khat a thun ve bawk. Blues hian mikhual an nihna hmunah awlsam takin hnehna an chang a, fourth round an paltlang.
Aston Villa an tla
Club lian ten hnehna an chan hlawm laiin Aston Villa chuan an mualah hnehna an chang zo lova, an mualah bul tan tha viau mah se Newcastle United in an lehthal a, an tla daih.
EPL ah pathumnaa awm mek Aston Villa hian an mikhual Newcastle lakah bul an tan tha viau a, minute 14 na lekah
Tammy Abraham chuan hmahruaina goal a thun nghal. Hma takah goal thun mah se chawlhlawk dawn hnaih minute 45+1 Marco Bizot hnawhchhuah a ni. Bizot hnawhchhuah a ni hi game thlak danglamtu a ni.
Chawlhlawk hnu lamah tam zawk an nih vangin Newcastle an khel tha thar hluai a, goal thum an thun zui ta reng bawk.
Magpies tan hian club lian zawkte awhrawn
Sandro Tonali chuan minute 63 naah goal thunin an si phurh a sut phawt a. Minute 76 naah hma an hruai letna goal a thun zui leh bawk. Hma an hruai let hnuin Nick Woltemade chuan minute 88-naah an goal thumna thunin an tawp a khar a. Hnufual zawk an nih zet hnuin hnehna an chang let a, round sang zawk an inhlangkai zui ta a ni.