City leh Newcastle United te an chak

Nilai zan khan UEFA Champions League khelh chhunzawm a ni a, EPL club Manchester City leh Newcastle United nen hnehn an chang. Newcastle leh City te an chak lai hian Chelsea an chak zo lo thung a, Blues hi EPL club zingah chak zo lo awmchhun an ni.
Foden a vul
EPL Club lian Manchester City hian Etihad Stadium-ah German club lian Borussia Dortmund an mikhual. An mikhual Dortmund lakah Phil Foden a khel tha viau a, goal hnih a thun. Foden vul zanah hian Erling Haaland pawhin a thiam a theihnghilh bik lova, goal a thun ve bawk. City hi Champions League khelh mekah tlawm nei lo team pali zingah an tel.
City hian an mikhual Dortmund hneh ngei tumin tan an khawh a, goal pawh an thun har lo. Midfielder khel tha tak Phil Foden chuan minute 22-naah Reijnders hnen atanga ball a dwan chu box pawn atangin a pet goal a, mawi takin hmahruaina goal a thun. An mualah goal thun hmasa zawka an tan vangin City an phur a, an khel tha sauh. Foden goal thun atanga minute sarih hnu lekah Erling Haaland chuan Jeremy Doku siamsak tha tak chu chiang zetin a pet goal a, minute 29-naah an goal hnihna thunin an hmahruaina a tizau. Foden leh Haaland goal thun hmang hian City in 2-0 a hmahruai chungin chawlhlawk an hmang.
City goal hnihna thuntu Erling Haaland khan season kal mekah club leh ram tan inelna hrang hrangah goal 27 zet a thun tling der tawh a, a chetha tluang hle. Haaland hian team hrang hrang lakah goal a thun tluang chho zel a, dang thei an awm meuh lo.
Chawlhlawk hnu lamah City an khel tha chhunzawm a, goal hmahruai thuntu Foden a vul chhunzawm. Player of the match a thlan zui tak Phil Foden hian box pawn atangin goal a thun nawn leh a, minute 57-na lekah an goal thumna a thun. Si thum fai ngawta an hnufual hnuin Dortmund in phurh belh huamin an khingpuite an nawr a, Waldemar Anton chuan minute 72-naah goal thunin an si phurh a sut then. An si phurh an sut then vangin phur thar bawk mah se City tan Rayan Cherki chuan minute 90’+1-naah an goal lina a thun zui leh cheu a, Dortmund tan beisei tur a awm ta lo. Cherki goal thun hnuin goal dang a luh belh thei tawh lova, City in an mualah hnehna changin point thum an hmuh belh.
Borussia Dortmund lakah an chak leh tak vangin Manchester City hian khelh li atangin point 10 an hmu a, palinaah an inhlangkai. Champions League season kal mekah Bayern Munich, Arsenal leh Inter Milan te an la chak vek a, City hian draw vawi khat an nei tawh thung a. UCL 2025-26-ah tlawm nei lova kal tluang club pali chiah an awm tawh. City in palina an luah lai hian Borussia Dortmund erawh chuan khelh li atanga point 7 hmuin 14-na an luah ve thung.
Newcastle an chak
City in an mualah hnehna an chan rual hian Newcastle United pawhin St James Park-a an mikhual Athletic Club chu 2-0 in an hneh a, point thum an hmu ve bawk.
Newcastle hian an mikhual Athletic Club lakah an khel tha viau a, Dan Burn chuan minute 11-na lekah hmahruaina goal a thun. Hma takah goal thun mah se goal dang erawh an thun belh thei mai lova, si khat faia hmahruai chungin chawlhlawk an hmang.
Chawlhlawk hnu lamah Newcastle an khel tha chhunzawm a, second half tan atanga minute lina lekah Joelinton chuan an goal hnihna a thun a, an hmahruaina a tizau. Joelinton goal thun hnu hian hun tawp thlengin goal dang a luh belh thei tawh lova, Newcastle United chuan an mualah point thum an hlawhchhuak zui ta a ni.
Champions League khelh mekah Newcastle an khel tha rih viau a, khelh li atanga point 9 hmuin parukna an luah. Newcastle in parukna an luah lai hian Spanish club lian Athletic Club erawh chuan khelh li atanga point 3 hmuin 28-na daih an luah ve thung.
Chelsea an chak zo lo
EPL club Manchester City leh Newcastle ten hnehna an chan laiin London club lian Chelsea an chak zo lova, mikhual an nihna hmunah FK Qarabag nen 2-2 in an inhnehtawk.
Chelsea hian mikhual a nihna hmunah bul an tan tha a, minute 16-na lekah Estêvão goal thun hmangin hma an hruai. Goal chhuah hmasa zawkah tang mah se Qarabag in an mikhualte an nawr let chiam a, goal hnih an thun zawn. Qarabag tan hian Leandro Andrade chuan minute 29-naah goal thunin an si phurh a sut a. Marko Jankovic chuan minute 39-naah penalty pet goal in hma an hruai letna goal a thun. Chelsea tan hian Alejandro Garnacho chuan minute 52-naah goal thunin an si phurh a sut. Chak tumin innawr tawn nasa viau mah se goal dang a luh belh thei tawh lova, 2-2 in an inhnehtawk zui ta a ni.
Kar laihawla Champions League khelhah EPL club te an chetha hlawm viau a, Arsenal, Manchester City, Newcastle United leh Tottenham ten hnehna an chang hlawm a. ULC a EPL club pnga zingah Chelsea chu chak zo lo awmchhun an ni. Chelsea hian khelh li atangin point 7 an hmu tawh a, 12-naah an awm mek a. FK Qarabag hi 15-naah an awm mek thung.