City leh Real an chak awlsam

Ningani zan khan Fifa Club World Cup 2025 group match khelh zawh a ni ta a, last 16 lut a hriat kim ta chiah. Ningani zana inkhelah champion tura rinkai zinga mi Manchester City leh Real Madrid ten awlsam takin hnehna an chang a. Group champion ni chungin last 16 an lut ve ve.
Group G-ah Europe-a team lian Manchester City leh Juventus in point 6 an hmu mek a, group champion nih inchuhin an innkhel. Inkhel pawimawh takah chak tumin an innawr tawn nasa viau a, goal pawh a lut hnem. Goal 7 ngawt luhna inkhelah Manchester City in 5-2 in hnehna an chang a, group stage-ah chak vekin, point 9 lai an hmu.
English club lian City hian Italian club lian Juventus lakah bul an tan tha viau a, goal an thun hma hle. Inkhel tan atanga minute 9-na lekah Jérémy Doku chuan hmahruaina goal a thun nghal. Hma takah goal an thun vangin phur viau mah se an phur rei lova, Juventus in an si phurh an sut thuai. Juventus tan hian Teun Koopmeiners chuan minute 11-naah goal thunin an si phurh a sut. Goal khat ve ve an thun hnuin inkhel a hmuhnawm zui viau a, vannei zawkah City an tang hmasa leh. Juventus player Pierre Kalulu chuan minute 26-naah an lamah a ti-goal palh hlauh a, City hmahruai nawn lehna goal a thun sak a. Pep Guardiola leh a hote hian 2-1 a hmahruai chungin chawlhlawk an hmang.
Chawlhlawk hnu lamah City an khel tha chhunzawm a, goal pawh an thun belh leh thuai. Minute 52-na lekah Erling Haaland chuan an goal thumna thunin an hmahruaina a tizau a. Haaland goal thun hnu hian Phil Foden chuan minute 69-naah an goal lina a hun a. Minute 75-naah Savinho chuan an goal ngana a thun belh zui leh ta mai a, minute 75 an khelh tlin hmain City in goal nga ngawt an thun hman a, an chak turin an dihmun a tha tawh hle. Sili ngawta hnuin Juventus tan hian Dusan Vlahovic chuan minute 84-naah goal thunin an si phurh a sut then. An si phurh sut then bawk mah se goal dang an thun belh thei tawh lova, City ngam lovin an tlawm zui ta a ni.
Group G-a inkhel dangah Al-Ain chuan 2-1 in Wydad AC an hneh a, point thum an hmu ve bawk. Group G-ah hian Manchester City in point hmuh theih zawng zawng hmu vekin group champioan an ni a, Point ruk hmuin Juventus an tlang a. Al-Ain leh Wydad AC te an tla ve thung.
Real Madrid an chak
Khawvela football club hausa leh hlawhtling ber Real Madrid in bul tan tha tawk loin an match hmasa berah Al-Hilal hneh zo lo ringawt mah se an insiamtha cho a, group champion ni chungin last 16 an lut. Real Madrid hian group match hnu hnung bera an khingpui RB Salzburg chu 3-0 ngawtin an sawp. An match hnuhnung berah an chak vangin Al-Hilal in last 16 an lut ve bawk.
Real Madrid hian Lincoln Financial Field, Philadelphia-ah RB Salzburg an hmachhawn. Salzburg lakah khel tha viau mah se goal erawh an thun hma thei bik lo. Chawlhlawk dawn hnaih minute 40-naah Vinícius Júnior chuan hmahruaina goal a thun a, hmahruaina goal an thun hnuin goal dang an thun belh leh thuai thung. Chawlhlawk hmaa hun pek belh minute 45+3-ah Federico Valverde chuan an hmahruaina tiazau turin an goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah Real Madrid an khel tha chhunzawm a, hun tawp dawn hnaih minute 84-naah Gonzalo García chuan an goal thumna a thun belh zui leh a, 3-0 a chakin point thum an hmu zui ta a ni.
Group H-a inkhel dangah Saudi Arabia club lian Al-Hilal chuan tla chiang tawh Pachuca chu si hnih faiin an hneh. Al-Hilal tan hian Salem Al-Dawsari chuan minute 22-naah hmahruaina goal a thun a, Marcos Leonardo chuan minute 90’+5-ah an goal hnihna thunin an chakna a nem nghet ve bawk. Pachuca lakah an chak vangin Al-Hilal hian Real Madrid laka tlawm RB Salzburg an lehpel a, lasat 16 an lut. Last 16-ah Manchester City an hmachhawn zui leh a ngai dawn thung a. City hmachhawn hi an tal thil chakawm a ni kher lo ang. Group H-a champion Real Madrid hian Italian club lian Juventus an hmachhawn zui leh dawn thung a, inkhel hautak tak a nih ngei a rinawm.
Group match thlirna
Fifa Club World Cup-a club 32 te inelna hmasa ber chu group match khelh zawh a ni ta a, group match ah Brazil club te an chetha hle. He inelnaah hian South America khawmual (CONMEBOL) atangin team paruk an tel a, chung zinga team pali chu Brazil club te an ni. Brazil club palite hian last 16 an lut vek a, Palmeiras leh Flamengo te group champion an ni a. Botafogo leh Flumines te pahnihna niin an tlang ve bawk. Brazil club te an chet that laiin Argentina club erawh an chetha lo viau thung a, inelna hmachhawn Boca Junior leh River Plate te last 16 lut zo lovin an tla ve ve. Brazil club te chetthat em em chhan hi an ram boruak nen a inan deuh vang nia ngaih a ni a. Khawlum tak hnuaia khelh hi Europe club te a harsa zual bik a, Brazil club te tan erawh thil thar a ni lem lo thung.
Inelna neih mek hi Europe khawmual; UEFA atangin club 12 in an hmachhawn a, club pakua in last 16 an lut a. Europe club atangin Atletico Madrid, RB Salzburg leh FC Porto te last 16 lut zo lovin an tla. Fifa Club World Cup hi Europe leh South America khawmual club te inelna a ni deuh ber a, heng khawmual pahnih atang hian champion pawh an awm ngei a rinawm. Khawmual dang tan final luh a, champion theihna chance a chhe viau niin a lang a, thil mak erawh thleng ve thut thei tho a ni.