Civil Hospital Aizawl-ah Trauma Care Facility din

Civil Hospital Aizawl-ah Trauma Care Facility siam a ni a, Ningani khan chief minister Lalduhoma’n a hawng.
Chief minister chuan Civil Hospital Aizawl hmasawnna leh mipui mamawh trauma facility hawn a ni chu a lawm hle tih a sawi a. A hming ang tak hian rikrum thila kan mamawh, nunna chhanna hmanhmawh thlak thawhna hmun a ni, tiin, mitin tana hmunhma tangkai a ni tih a sawi.
Civil Hospital Aizawl Block A leh Block B sak thatna tur hi PMJVK atangin cheng vaibelchhe 88.33 ruahman a ni a, hna tan thuai tum a ni tih leh, lung zaina hmun, kal thlak theihna leh IVF tihna dah an rilruk tih sawiin, “Kan doctor-te an thiam em em a, an mamawh facility kan pe lo ni mai zawkin kan hria. An mamawh hmunhma leh hmanrua chhawpsak a, phai lam kan panna thin tam tak hi neih ve kan tum a ni,” a ti.
Facility Centre chu tihchangtlun zel a ni dawn a, a sira hmuhma zim, Health department ta ni si lo pawh sawiho thaa an hriat thu a sawi bawk.
Health minister Lalrinpuii pawhin Health department tana chief minister-in hma a lak nasat tawh dan leh an dil apiang a la pek deuh zel thu sawiin, “Hei hian ram mipui hriselna a ngaihpawimawh zia a tilang a, sawrkar hospital tihhmasawn hi mirethei zawkte tan bawk a hlut avangin, mirethei zawkte hmakhua a ngaih zia a chiang hle a ni,” a ti.
India sawrkarin national highway-ah km.100 dan zelah Trauma Centre dah tur, tih dan a nei a. Kawngpui (highway) a chesualten darkar khat chhungin Trauma Centre an thleng hman tur a ni, tiin a din dan tur duansa a awm. Mizoramah trauma care facility hi hospital 7-ah din a ni tawh a. Lawngtlai leh Lunglei tih loh zawngah a function tawh.
Civil Hospital Aizawl bik hi a sakna tur ram chungchangah buaina a awm avang leh Covid leng avangin sak mai lohin a awm a, 2022 Febuary-a sak tan a ni. Central atangin nuai 121.50 dawn a ni a, state sum nuai 450 pek belh a ni.