Civil Hospital Lunglei thuamtha turin an ngen
Civil Hospital Lunglei
thuamtha turin an ngen
Civil Hospital Lunglei-a khawl leh hmanrua hman theih loh a awm nual leh hmanrua leh thawktu indaih lohna awm mek chu a rang lama ngaihtuah sak turin sawrkar an ngen tih MNF party chuan an sawi.
MNF Sub.Hqrs Lunglei Vigilance Department thuchhuak chuan, Civil Hospital Lunglei an tlawhnaah MNF sawrkarin mipui mamawhna hriaa oxygen plant lian, oxygen mamawh dam loten an hip theihnan ward tin khum zawng zawnga thlunzawm vek tawh chu a khawl a that loh avangin hman theih lohin a awm tih a sawi.
Tunhmaa Silchar leh Aizawl atanga oxygen cylinder lak chawp ngai thin chu MNF sawrkar khan ti boin, Pukpuiah oxygen siamna a din a. Civil Hospital-a dam lo, a mamawhtuten awlsam taka oxygen an hip theihnan khum tin thleng vekin oxygen pipe line-a zam chhuah vek an dah tawh bawk, tiin, tun sawrkarin a ngaihthah avangin, oxygen pek chhuahna khawl hi a chhia a, hman theih lohin a awm tih a sawi a ni.
‘Dam lo hmakhua ngaihna leh oxygen mamawhtuten rang taka oxygen an hmuh /hip zung zung theihnan a rang thei ang bera siamtha a, function-tir turin sawrkar kan ngen a ni,’ a ti.
Civil Hospital-ah hian syringe pump an indaih lo hle tih MNF Sub.Hqrs Lunglei hian sawiin, syringe pump 6 awm zinga 3 chauh a hman theih a, sawrkarin ngaihven rang se an duh tih a sawi.
Dam lote dinhmun – an marphu, BP, respiration, temperature, SPO-II leh thil dang enna monitor function thei lo a awm nual bakah Civil Hospital-a thawktu indaih lo lutuk chu Health minister-in a hre lo nge a hai der tih a zawt a. Mizoram chhim biala hospital lian berah tunah department tinah doctor pakhat chauh awm ang an ni chu thuam that a ngai hle tih a sawi a ni.
‘Naupang doctor (pediatrician) pakhat chauh hospital liana a awm hi sawrkar tan a mualphothlak a, a dang pakhat tal Civil Hospital Lunglei hian an neih belh a ngai hlein, a rang lama dah turin kan ngen a ni. Tunhnai khan pediatrician doctor pakhat dah tura tih a ni zet a, zawm pawh a zawm hma in hmun danga awm tura sawn a ni a, Lunglei ngaihpawimawh lohna lian takah kan ngai,’ a ti.