CJP-in ‘Kya Bolti Public’ campaign-a an thu ken tur puang

Cockroach Janta Party (CJP) chuan ram pum huapa ‘Kya Bolti Public’ campaign an neih tura an thu ken turte an puang a. Zirna siam that, hna nei lo tam, zirna ina thil langtlang leh vantlang huap pawlte nena thawhhona siam an tum dawn.
September atanga tan tur, ram pum huapa listening tour neih tur hi Chhatrapati Sambhajinagar-a ni hnih awh National Working Committee an thutkhawm zawhah an puang a. Campaign hi Youth Reform Charter siam hmaa ram chhunga thalaite tel ve theihna, an duhthusam, an ngaihtuahna leh an vei hriat thiamna tura beihpui thlakna a ni ang.
Zirtawpni khan CJP co-convenor Saurav Das-a chuan X-ah movement hian inthlanpuiah thutiam siam ai chuan ngaihthlak a ngaih pawimawh zawk dawn tih a tar lang.
“Zirna kalphung siam that leh hna nei lo tam lutuk hi kan ngaih pawimawh ber a la ni reng a. Zirna inten thil an ti tak tak lo a nih chuan mipui rorelna hi nihna ang a taka a kal theih loh avangin thil langtlang a awm theih nan pawh nawr kan chhunzawm zel dawn,” a ti.
An party chuan pawl, movement leh mipui, dikna chungchanga thawk thinte chu inzawmkhawmtir an duh thu sawiin, “Pawl pakhat chauhvin hnam pakhat chauh a thlak danglam thei lo,” a ti.
Party-in document a tihchhuahah ‘Kya Bolti Public’ campaign hi thupui palia innghat a ni dawn a. Primary atanga higher thlenga zirna kalphung siam that te; zirna atanga hna nei siam te, vocational training leh sumdawnna nena inzawm hna siamna ngaih pawimawh; zirna ina thil tih tak takna, chanchinbu, inthlan leh court rorelna kaihhnawih dikna a awm theih nana beih leh zirlai pawl, vantlang huap pawl leh politic-a telte nena inpumkhatna leh thawhhona siam tih te a ni.
CJP chuan September 1 atangin an hruaitute chu an zin chhuak dawn tih sawiin mipuite nena inpawh tawnna tur leh a tawpah Youth Reform Charter an siam tura rawtna an khawn khawm dawn tih a sawi.
Campaign rual hian CJP chuan ram pum huapa membership drive kalpui a nih tur thu a puang bawk a, zirlai, professional thalai, hnathawkte leh mipuite chu an pawl zawm turin a sawm.
CJP chuan tun dinhmunah mipui thawhlawm an pawm loh thu a tichiang a, an hminga sum zawngtu tu pawhin fimkhur turin an ngen a. Sum thawh dun tana an pekna tur chu website leh social media account chiang zawk kaltlanga puan a nih tur thu a sawi.
Das-a chuan thlawptute atangin ngenna awm mek mah se CJP chuan inthlan chuha politic-a luh tumna a nei lo tih a sawi nawn leh bawk.
“Mi tam takin political party ni turin min ngen a, min rinna avangin kan lawm a. Mahse, tun dinhmunah chuan kan chakna hi inthlak danglamna bul tanna dik takah kan hmang tha zawk a ni,” a ti.
Campaign hi Thawhlehni khan CJP dintu, Abhijeet Dipke-a’n a puang a, zirna siam that chu an ngaih pawimawh ber a la nih tur thu a sawi a, sikul, college leh coaching man sang zel chuan zirna tha banphak lohna a siam niin a sawi.
Dipke chuan hna nei lo, a bik takin zirlai chhuakte zingah an tam chu an hmalaknaa thil pawimawh tak a nih tur thu a sawi bawk.
CJP chu tun hnaia NEET-UG 2026 zawhna put nia sawi chungchanga an nawrh huaihawt thlawptu activist, NGO leh pawl dangte nen an thawkdun dawn tih a sawi bawk a, mimal emaw pawl pakhat mahin ram harsatnate chu anmahni chauhin an chin fel theih loh thu a sawi bawk.